By PR | 10:50 AM April 16, 2024
Na emosyonal si Bise-Presidente Sara atol sa iyang pagduaw sa haya sa duha ka piloto nga namatay human na-crash ang helicopter nga ilang gisakyan duol sa Cavite Public Market niadtong Abril 12.
Matud pa sa Philippine Navy, personal nga gipadangat ni Bise-Presidente Duterte ang iyang pagduyog sa pamilya sa duha ka mga biktima nga sila si Lt. John Kyle Borres, 36, ug ang iyang babaye nga co-pilot, Ensign Izzah Leonah Taccad, 27 sa Libingan ng mga Bayani sa Fort Bonifacio, dakbayan sa Taguig.
Sumala pa sa mga pasiuna nga mga pakisusi kabahin sa panghitabo, sila si Borres ug Taccad nadestino sa Naval Air Sangley Point sa dakbayan sa Cavite. Ang helicopter nga ilang gisakyan migikan sa Sangley Airport sayo sa buntag niadtong Abril 11 ug nahagbong gibana-bana alas 6 sa buntag.
Di bag-o alang sa Bise-Presidente ang personal nga pagduaw sa haya sa mga sundalo ug pulis nga namatay samtang nagserbisyo sa katawhang Pilipino. Bisan pa sa kahagip-ot sa iyang panahon, kanunay niyang lugaran ang maong pagpadangat sa iyang pahasubo.
Gani kung motugot ang iyang panahon, personal usab nga moduaw ug makighinabi si Bise-Presidente Duterte sa mga nanga-angol ug samaran nga sundalo ug pulis sa mga enkwentro ug aksidente.
Usa ka reservist sa Armed Forces of the Philippines, kasamtangan siya nga naghupot og ranggo nga colonel.
Apan wa gayud kapugngi ni Bise-Presidente Inday nga motulo ang iyang luha samtang nagpa-abot sa iyang pahasubo sa banay sa duha ka mga piloto.
Sa usa ka video nga gipagawas sa Philippine Navy ngadto sa media, namatikdan nga gipahiran sa Bise-Presidente ang iyang luha atol sa maong pagduaw.
Sumala pa sa usa ka pamahayag gikan sa Philippine Navy, gipadangat sa Bise-Presidente ang iyang pahasubo sa mga nagbangutan nga mga pamilya sa duha ka mga piloto samtang nagpadangat sa iyang pagsaludo sa ilang yano nga serbisyo ug sakripisyo nga gihatag sa nasud.
Isip reaksyon sa nahitabong aksidente, temporaryo nga gidili ang pagpalupad sa susama nga mga helicopter samtang gipadayon ang lapad nga imbestigasyon aron pagsuta sa tinuod nga hinungdan sa maong pagkahagba.
