By Rey Anthony Chiu | 08:29 PM March 25, 2024
Mobalik na usab sa tulo ka adlaw nga pamaligya ang Kadiwa ng Pangulo nga una na nga nagpalatag sa produktong gikan sa umahan, ug mga gagmay nga mamumuhunan sa Bohol, karon nga Abril 15-17.
Matag adlaw, may 4500 ka mga mamalitay ang mingsubay sa tulo ka adlaw nga Kadiwa ng Pangulo didto sa old airport ning syudad sa Tagbilaran gikan sa Marso 15-17, 2024.
Kini nga datus nagatug-an nga bisan sa ka tuyoon sa daan nga airport, basta may saad sa barato, presko ug makapahimsug nga pagkaon, tuyoon gyud og adto, segun pa sa mga tigpasiugda.
Gipangunahan sa Kapitolyo, Department of Agriculture ug sa Office of the Provincial Agriculturist (OPA) ug Office of the Provincial Veterinarian (OPV), sa Bureau of Fisheries and Aquatic Resources, sa Department of Trade and Industry, Department of Interior and Local Government, Department of Social Welfare and Development, Department of Labor and Employment ug sa 47 ka mga kalungsuran sa Bohol, ang Kadiwa ng Pangulo nagtumong sa pagtabang sa mga mag-uuma nga makatanyag sa ilang mga produkto nga wala nay mang-angkat kay kini namatikdan nga maoy mopamahal sa presyo niini.
Tumong usab sa Kadiwa ang pagsumpay sa mga mag-uuma ngadto sa mag mamalitay ilabi na sa mga dagkong resort, hotels ug resturants lakip na ang mga ginagmay nga carinderia nga manginahanglan sa regular nga supply sa lagutomon ug utananon, mga presko nga karne ug mga giproseso nga produkto, pasabut ni Provincial Administrator Aser Caberte.
Labing dagko nga halin sa tulo ka adlaw nga agri-fisheries and products fair mao ang 47 ka LGUS nga ming-abut sa P 455,803.00, gisundan sa Department of Agriculture nga naghiusa sa 10 ka exhibitors nga ming-uli dala ang P206, 017 nga halin.
Ikatulo sa mag dagkong halin ang OPA nga may 9 ka exhibitor ug mionghalin og P179,803.00 dayuna ng OPV nga may 15 ka exhibitors nga minghalin og kinatibuk-an nga P120,071.
Sa tulo ka adlaw nga pamaligya, ang Kadiwa ng Pangulo minghalin og P1,171,419, segun pa sa taho nga gikan sa Bohol Economic Development and Investment Promotions Office (BEDIPO).
