By Rey Anthony Chiu | 08:35 PM March 25, 2024
Taman sa alas 12:00 sa udto lamang ang trabaho-an sa Marso 27, Miyerkoles Santo.
Ug kay holiday na man usab sa Huwebes Santo, Biyernes Santo, Sabado Santo ug Domingo sa Pagkabanhaw, may upat og tunga ka adlaw nga nagahin alang sa balaang paghandum sa mga kalihukan sa Semana Santa.
Kini usab human gideklara sa Malacanang ang pagsuspenso sa trabahoan sa goberno gikan sa udto aron makahigayon ang mga empleyado sa paghandum sa Huwebes Santo ug Byernes Santo human mahatagan sa higayon nga makabyahe pauli sa ilang mga tagsatagsa ka mga kalungsuran, lalawigan o rehiyon.
Sa Memorandum Circular No 45 nga gilagdaan sa katungod sa Presidente pinaagi ni Executive Secretary Lucas Bersamin, niadtong Marso 25, gipatin-aw usab dinhi nga kadtong mga ahensya nga nahilambigit sa pagtumod sa mga batakang serbisyo sama sa health services, disaster preparedness ug response sa mga katalamgman o kalamidad, ug ang paghimo sa mga gikinahanglang mga serbisyo magpadayon sa ilang operasyon aron ikatanyag gihapon ang nahisgutan nga mga serbisyo.
Gidugang usab sa pagpasabut sa MC nga ang pagsuspenso sa trabaho sa mga trabahante sa pribadong sector, kompanya ug buhatan, magdepende sa pagtimbangtimbang sa ilang mga natungdan nga mga employers. (PIABohol)
