By Marisol Bo-oc | 08:25 PM February 26, 2024
Ang Philippine Ports Authority-Ports Management Office (PPA-PMO)- Bohol nagpahigayon og pag-ampo ug wreath laying ceremony alang sa namatay nga tripulante sa M/V Ocean Jet 888 karong adlawa, Pebrero 26, 2024 sa Tagbilaran Port.
Si Marcelo Casulocan, 27 anyos ug lumad nga taga Barangay San Isidro sa lungsod sa Pilar, Bohol aksidenteng nahulog sa barko ug nagaling sa propeller sa barko niadtong Biyernes sa buntag, Pebrero 23.
Gikontak usab sa PMO-Bohol ang mga representante sa Ocean Fast Ferries Inc.-Tagbilaran ug gikompirmar nga kagahapong adlawa gibisita sa kompanya ang pamilya aron paghatag og pahasubo ug paghatag og hinabang pinansyal.
Sa pagkakaron giatiman na ang tanang Insurance Benefits nga angay alang sa namatay nga biktima.
Lakip sa mitambong sa maong seremonya mao ang Ocean Fast Ferries Inc., PPA Operations ug Port Police personnel ug ang Philippine Coast Guard.
