By PR | 09:05 AM February 27, 2024
Personal nga gipadangat ni Gobernador Aris Aumentado ang mainitong pahalipay ngadto sa pito ka mga Boholano Topnotchers niadtong Pebrero 26 atol sa ilang pagbisita ngadto sa iyang buhatan sa bag-o nga Kapitolyo.
Matud ni Aumentado, iyang giisip nga dakong dungog ang ilang gikatampo sa lalawigan sa ilang pagsakmit sa mga dapit nga nahisulod sa unang napulo ka pwesto atol sa gipahigayon nga mga “professional licensure examinations” sa tuig 2023.
Ang seremonyas sa paghatag sa gobernador sa pahalipay gikan sa kagamhanang probinsyal gisaksihan sa mga ginikanan ug mga mahal sa kinabuhi sa mga topnotchers.
Ang mga gipasidunggan ug ang kantidad nga nadawat mao sila si Gelyn Aparilla, BISU Candijay, 5th Placer Teacher Elem. LE, P75,000; Mary Grace Junaldo, BISU Tagbilaran, 9th Placer Teacher Elem. LE, P50,000; Aaron Matt Ampong, BISU Tagbilaran, 10th Placer, Teacher Elem. LE, P50,000; Love Lerisa Balo, BISU Tagbilaran, 10th Placer Teacher Elem. LE, P50,000; Chris Alfred Yntong, BISU Candijay, 6th Placer Fisheries Technologist LE, P50,000; Genny Marie Geñoso, UP Diliman, 2nd Placer Geodetic Engineer LE, P75,000; ug Erikka Blaze Mondredondo, VSU Baybay, 8th Placer Nursing LE, P50,000.
Ang maong programa subay sa ordinansa nga bag-uhay lang naaprobahan sa Sangguniang Panlalawigan ubos ni Bise Gobernador Dionisio Victor Balite.
Gipasalamatan usab ni Aumentado ang mga ginikanan sa mga top notchers ug mga mahal sa kinabuhi gumikan sa ilang mga suporta sa panahon nga mipailawm sa board examinations ang maong mga topnotchers.ALT/PIMO
