By PR | 09:45 AM December 01, 2023
Atua sa Dubai City karon ang usa ka delegasyon aron pagtambong sa Conference of Parties (COP)28 nga ginapahigayon Disyembre 1-2.
Usa sa mingtambong si Gobernador Aris Aumentado.
Ang maong tigum gitambongan sa mga opisyales sa nagkalain-laing mga nasud aron tuki-on ang mga suliran kabahin sa kausaban sa klima nga naghulga sa katawhan sa kalibutan.
Ang Local Action Climate Summit gipasiugdahan sa Presidency and Bloomberg Philanthropies.
Si Aumentado uban sa mga lokal nga ehekutibo sa pangagamhanan, mga representante sa sektor sa pamatigayon ug mga non-government organization (NGO) nagtinguha nga mag-alayon aron pagkab-ot sa hiniusang tubag sa hulga sa katilingban.
Subay sa kasinatian sa Bohol niadtong nakalabay nga bagyong “Odette”, tukma kini sa pag-umol og dugang mga konkreto nga aksyon batok sa nag usab-usab nga lakaw sa panahon.
Kahinumduman nga niadtong Hulyo 22, atol sa pagsaulog sa Bohol Day, gipakanaog ang Executive Order No. paglusad ug pag-establisar sa “Bohol: First Regenerative Island Project” isip giya sa pag- umol og mga inisyatibong pangkalikopan.
Si Aumentado nagpadayag sa iyang makusganon nga pagpreserbar sa kalikopan, subay sa strategic change agenda niini nga subay usab sa pagkatudlo sa Isla sa Bohol isip UNESCO Global Geopark.
Ang summit magasentro sa tema nga nagatutok sa local climate finance, ug mga kontribusyong lokal alang sa kinatibuk-ang aksyon, pagpadali sa local energy transition ug pagsangkap alang sa malahutayon nga mga komunidad.
Ang COP28 tumong sa kalibutanong panagsabotsabot bahin sa climate crisis.
Giila usab niini ang kritikal nga papel sa mga lokal nga opisyales sa ilang pagtubag sa risgo bahin sa nag-usab-usab nga klima ug pagpalapnag sa mga kahimuan gikan sa nasyonal alang sa mas mabungahon niini nga kalihukan. PiMO/ALT
