By PR | 11:23 AM February 20, 2024
Nakadawat og suporta gikan sa Kapitolyo ang kapunongan sa mga masahista, manghihilot ug manikurista niadtong Pebrero 19.
Gipanguluhan ni Gobernador Aris Aumentado ang “ceremonial turn-over sa mga “massage supplies and equipment” ngadto sa Tagbilaran Masseurs, Manicurists and Vendors Association (TaMMVA) ug sa Kapunungan sa mga Manghihilot ug Manikurista sa Bohol (KaMaMaBo) didto sa Ceremonial Hall.
Uban sa gobernador sa maong kalihukan si Bokal Lucille Lagunay sa unang distrito ug si Meta Tecson, hepe sa Office of the Provincial and Social Welfare and Development (OPSWD).
Si Tecson nagkanayon nga giduso ni Aumentado ang duha ka kapunungan, ngadto sa ilang buhatan pinaagi kang Provincial Administrator Asteria Caberte aron matutukan ang panginahanglan kabahin sa ilang kapanginabuhian.
Tumong ni Aumentado nga makapagawas og pondo ang kagamhanang probinsyal alang sa dugang mga pagbansay sa mga masahista nga magpasakop og kapunungan.
Ang pagbansaybansay gipasiugdahan sa Technical Education Skills and Development Authority (TESDA).
Matud ni Tecson, ang 45 ka mga masahista gipailawom sa “15-day community based training program” sa TESDA nga Wellness Massage isip refresher course.
Mokabat sa 28 ang malampusong nakagradwar sa maong pagtuon ug nakabaton sa NC-II gikan sa TESDA.
Dugang ni Tecson, iyang nakita nga andam na ang maong mga masahista sa pagtrabaho sa gawas sa nasod kung gikinahanglan.
Sa laing bahin, gidayeg ni Lagunay ang panlantaw sa Aumentado aron pagpalambo sa panginabuhi sa mga masahista aron usab pangandam sa pagdagsa sa mga turista nga mahiligon magpamasahe.
Gitunol ngadto sa mga sakop sa TaMMVA ug KaMaMaBo ang mga massage starter kits sama sa puti nga tuwalya, dako nga payong, haplas ug uban pa nga kinahanglanon sa masahista.
Sumala sa OPSWD, mikabat og P9,000 ang gigahin alang sa matag magtutuon sa ilang pag-apil sa pagbansay-bansay ug alang sa ilang massage starter kits.
Gipadangat ni Aumentado ang iyang kalipay ug pagpasalamat ngadto sa OPSWD sa ilang seryoso nga kaakuhan pagpalambo sa TaMMVA ug KaMAMABo.
Matud pa nga makontak ang maong mga masahista sa Plaza Rizal sa dakbayan sa Tagbilaran. ALT/PIMO
