By Marisol Bo-oc, Helen Castaño | 08:27 PM February 12, 2024
Adunay pito ka mga tawo nga nagpalibot ni Gobernador Aris Aumentado sa Kapitolyo nga gitawag og “little governors” maoy nagsige og pangwarta.
Kini matud ni Ronie Orillosa, usa ka concerned citizen atol gihimo nga press conference karung Lunes, Feb. 12.
Matud ni Orillosa angay badlungon ni Aumentado ang 7 ka nga “little governors” kay maoy makaguba sa iyang imahe.
Wala gihinganlan ni Orillosa kinsa ang pito pero igo lang siya minghatag og “hint” nga “naa ra sa kilid sa gobernador.
Gituki usab ni Orillosa ang nagkalaing issue sa Bohol sama sa pagbalik sa ilegal nga droga sa Bohol.
Iya usab gisaway si Provincial Administrator Aster Caberte nga walay nahimo kabahin sa mahal nga presyo sa mga palitunon sa Bohol sama sa bugas ug isda.
“Maam, naa ka sa DTI (Department of Trade and Industry) sauna pero wala kay nahimo sa pag us us sa presyo sa Bohol,” matud pa ni Orillosa.
Si Caberte nahimong provincial ug regional director sa DTI. Sa wala pa siya mahimong provincial administrator, si Caberte nahimong assistant secretary.
Nakig-atubang sa mga sakop sa media Orillosa aron ipadangat ang iyang mensahe ngadto ni Aumentado nga kinahanglang mohimo og aksyon ang gobernador batok sa mga nagpalibot kaniya nga matud pa makadaot sa iyang imahe ug paningkamot para sa Bohol.
Wala pay opisyal pamahayag ang Kapitolyo kabahin sa pasangil ni Orillosa.
