By PR | 10:43 AM January 11, 2024
Mokabat sa 19 ka mga lungsod sa lalawigan ang nakabaton ug bag-ong mga mobile patrol car alang sa gihingusgang kampanya sa kahusay ug kalinaw ubos sa termino ni Gobernador Aris Aumentado.
Kini mao ang mga lungsod sa Alicia, Anda, Balilihan, Batuan, Calape, Catigbian, Clarin, Cortes, Dagohoy, Dimiao, Duero, Getafe, Loboc, Maribojoc, Sagbayan, San Miguel, Sierra Bullones ug Tubigon.
Sa pikas bahin, ang lungsod sa Valencia makadawat og brand new 4×2 Toyota Hi Lux nga gikan sa PNP National Headquarters.
Ang Police Regional Office 7 mao ang mi turn over sa maong mga sakyanan niadtong Enero 9 didto sa syudad sa Sugbo ngadto sa mga hingtungdang police stations
Gihimo kini atol sa traditional flag raising ceremony nga pangulohan ni PBrig. Gen. Anthony Aberin, ang hepe sa Central Visayas PNP.
Ang kapolisan sa probinsya ubos sa pagpangulo ni PCol. Lorenzo Batuan, nagpadangat sa pagpasalamat sa logistic section sa PNP National Headquarters tungod kay wala gayud hikalimti ang lalawigan sa Bohol.
Usa ang kahapsay ug kalinaw sa pinaka gitutukan sa administrasyong Aumentado ug pagmatuod niini mao ang pag-ila isip sa Bohol isip ikaduha sa pinakalinawon nga probinsiya sa nasud. (PIMO/AT)
