By Rey Anthony Chiu | 05:56PM December 01, 2023
Kawaloan ka porsyento sa dul-an sa 400 ka mga trabahante nga nakatrabaho karon sa bag-ong gibuksan nga shipyard sa Barangay Cruz, kanhi mga batan-ong wala kaeskwela ug walay trabaho nga taga Buenavista ra usab.
Kini maoy gibutyag ni Buenavista Mayor ug abogado Dave Duallo, didto sa seremonyas a pagbukas sa Artemis Marine Industrial Construction Incorporated (AMICI) nga shipyard sa duha ka ektarya nga luna sa Cruz, Buenavista, atul sa iyang pagpamulong sulod sa Admin Building sa nahisgutang pasilidad.
Si Duallo mapasalamaton sa Amici ug sa mga opisyales niini tungod sa pagpili niini nga adto itukod ang ilang shipyard sa iyang lungsod.
Ang shipbuilding ug ship repair, usa ka labor intensive nga pamuhunan ug tungod kay magpadagan sila sa negosyo sa 24 oras ug 7 ka adlaw matag semana, gisagop nila ang 3 ka shits matag adlaw hinungdan nga walay putol ang trabaho.
Daku kaayo og gikatabang sa paghatag og kapanginabuhian ug panarbaho nga nagpabalik sa paglaum sa mga kabatan-onan nga makakita og panginabuhian sa maayong paagi, saysay sa mayor.
Ang Buenavista kaniadto, gi-isip nga lugar nga may daku nga suliran sa kahusay ug kalinaw, apan, matud sa mayor, kasagaran sa mga hitabo, ang sinugdanan ang personal nga binggkil ug wala na ang kanhi uso nga pusil patay nga walay hinungdan.
Dugang ni Duallo nga tungod sa AMICI ug sa ilang gipatuman nga unom ka buwan nga Deck Marine Cadetship Program, ang mga kabatan-onan nga wala makaeskwela og makakuha sa kurso sa Nautical ug Marine, makasakay pa gihapon sa barko tungod sa ilang bansay sa pagpangumpuni sa unsay sulirans a barko.
Ang AMICI, matud pa ni William Christopher Liu Jr., Presidente sa Primary Group of Builders, kinsa usab ag nanag-iya sa Primary Homes ug Maayo ventures, nagdala sa panarbahoan ngadto sa mga lugar nga nanginahanglan niini.
Mas pillion namo nga mosulod sa mga lugar nga less fortunate ug wala pa kaayoy development, aron sa bisan sa gamay nga paagi, makatabang, butyag ni Liu.
Ang AMICI nga mipabukas sa ilang shipyard, may mga bansay usab kaubans a TESDA, sa mga gikinahanglang skills alang sa paghimo ug pag-ayo sa mga barko sa bisan unsa nga kadak-on.
Gani, paambit ni Liu nga matud pa sa Marine Industry Authority sa Region 7, amg AMICI maoy labing maayo nga shipyard sa Visayas ug sa Pilipinas.
Niini, malipayon nga gidawat ni Gob Erico Aristotle Aumentado ang pagsulod sa Amici dungan sa dugang hangyo sa mga tigpamuhunan nga subayon ang northeastern Bohol diin mahimotang ang Industrial Economic Zone niining bahin sa Bohol. (rahc/PIA-7/Bohol)
