By PR | 10:16 PM November 21, 2023
Giapud-apod ang 171 ka mga titulo ngadto sa 11 ka mga benepisyaryo sa Department of Agrarian Reform (DAR) sa gipahigayon nga E-Title distribution niadtong Nobyembre 18 sa lungsod sa Loon.
Ang seremonyas gitambongan nila ni Gobernador Aris Aumentado, Kongresista Edgar Chatto, World Bank development regional director Anna Wellenstein, DAR regional director Leomidas Villareal, Dr. Ronald Pumatong, hepe sa DAR Bohol ug Bise Mayor Lloyd Peter M. Lopez.
Personal usab nga nisaksi sa pagtunol sa mga titulo sila si Asec Josef Angelo Martires ug Asec Marjorie Ayson sa DAR.
Mokabat sa kinatibuk-ang area ngadto sa 101.7497 ka ektarya ang gilangkob sa mga E-Titles sa mga agrarian reform beneficiaries (ARBs) sa maong kalihukan.
Sa kinatibuk-an, 137 ka mga rehistradong titulo ang gidawat sa 92 ka mga ARBs, tugbang sa 84.23 ka ektarya nga yuta ang opisyal nga duna na’y mga titulo ang tag-iya nga mga mag-uuma.
Gikan kini sa 14 ka mga lungsod nga mao ang Batuan, Carmen, Catigbian, Loon, San Isidro, Alicia, Dagohoy, Getafe, Pilar, San Miguel, Sierra Bullones, Talibon, Trinidad ug Ubay.
Si Wellenstein nipadangat sa pahalipay gikan World Bank sa tanan nga benepisyaryo sa SPLIT.
Ang World Bank Maoy naghatag sa pondo isip suporta sa programa sa DAR nga dili na pabayaron ang mga benepisyaryo sa yuta nga gipanghatag niini.
Si Villareal nipahibaw sa mga ARBs nga usa ka balaodnon ang gipirmahan ni Pangulo Ferdinand R. Marcos Jr. niadtong Hulyo 7 ning tuig. Ang R.A. 11953 kon New Agrarian Emancipation Act naglatid nga dawaton sa mga benepisyaryo sa Agrarian Reform ang ilang titulo nga libre, wa na’y mga balayrunon sa principal loan, interest ug bisan sa estate tax.
Gipasabot ni Angelo nga kamanduan ni Kalihim Conrad Estrella III sa DAR nga paspasan ang paghatag sa mga titulo ngadto sa mga mag-uuma, aron mapahimuslan niini ang mga benepisyo gikan sa nasudnong kagamhanan ug kini pinaagi sa programa nga Support to Parcelization of Lands for Individual Titling (SPLIT) Project.
Atol sa programa, nagpasalamat si Aumentado sa DAR sa programa sa Comprehenssive Agrarian Reform Program pinaagi sa SPLIT kay daghang mga Bol- anon nga natabangan niini.
Gidasig sa gobernador ang mga mag-uuma nga ampingan ang ilang titulo ug tikaron ang yuta nga ila nang napanag-iya alang sa food security sa ilang kaugalingon nga pamilya.
Sa laing bahin, si Chatto niawhag sa tanan nga pahimuslan ang yuta nga ilang nadawat sa gobyerno. Ang ilang titulo dili lamang kabtangan para sa ekonomiya kon di legasiya kini nga ginapasa ngadto sa kaliwatan. ALT/PIMO
