By PR | 10:09 PM November 21, 2023
Giabi-abi ni Gobernador Aris Aumentado ang mga tinugyanan sa World Bank (WB) nga ania sa Bohol isip kabahin sa nagpadayong suporta niini sa nagkalai-laing mga proyekto sa lalawigan.
Usa ka breakfast meeting ang gitanyag sa gobernador niadtong Nobyembre 18 sa iyang buhatan sa kapitolyo sa 16th WB implementation support mission nga gipanguluhan ni Anna Wellenstein, ang Sustainable Development regional director for East Asia and the Pacific.
Mitambong usab ang mga tinugyanan sa Philippine Rural Development Program (PRDP) ug DA-RPCO7 nga gipanguluhan ni Engr. Cirilo Namoc uban ang PPDO nag gipanguluhan ni manlalaban John Titus Vistal ug Engr. Ronilita Bunado.
Gipasalamatan ni Aumentado ang mga bisita sa suporta niini ngadto sa kagamhanang probinsyal sa daghang katuigan.
Si Wallenstein nagpasalamat usab ngadto kang Aumentado sa mainitong pag-abiabi niini. Nakadayeg siya sa aktibo nga liderato sa gobernador, pagpakighinabi sa presidente ug sa mga hingtungdang mga ahensya, maangkon ang suporta alang sa abtik nga pagpatuman sa strategic change agenda niini.
Gidayeg ni Wallenstein ang Bohol Island sa pagbaton og talagsaon nga pasidungog gikan sa UNESCO isip nag-inusara nga Global Geopark sa tibuok nasod. Lakip niini nga giila ang kusganon nga pagpanalipod sa panginabuhian sa 48,000 nga mga mamuhiay og baboy o ang P6 Billion nga industriya sa baboy, batok sa African Swine Fever.
Sa pagkakaron, ang Bohol ug Siquijor na lamang ang mga lalawigan nga nagpabilin sa Rehiyon 7 nga ASF Free o anaa sa Dark Green Zone.
Apil nga gipasidunggan sa World Bank ang PPMIU ug ang tibuok technical team sa kapitolyo tungod sa maayo nga pagdumala sa mga proyekto sa PRDP nga gipondohan sa World Bank.
Sa laing bahin, gipresentar ni Aumentado ngadto sa World Bank pinaagi kang Vistal ang katikaran sa mga gipahimutang nga proposed Sustainable Inclusive and Reselient Tourism (SIRT) projects sa lalawigan subay sa MOA tali sa TIEZA ug World Bank.
Lakip niini ang Bohol Bulk Water Supply Projects, Solid Waste Management Facility, Tourism Site Enhancement and Management, Bohol Destination Markets Program( Palengke Program) ug uban pa.
Gituki usab ang proposal ni Aumentado ngadto sa DPWH bahin sa Circumferential Road nga gitawag og Super High Way. Dako ang pagtuo ni Aumentado nga kining maong proyekto mao ang solusyon sa problema sa trapiko karon ug sa umaabot.
Nahisgutan usab ang pagtukod og SABO dam sa Loboc. Subay sa pagtuon, nakit-an nga kung mamuntar ang maong dam, mapugngan niini ang grabe nga pagbaha sa tubig nga gikan sa Loboc River panahon nga adunay bagyo nga sama sa bagyong Odette.
Gikauyonan nga himuon ang dugang diskusyon bahin niini sa Nobyembre 20-22 kauban si manlalaban Lesley Jeanne Yu Cordero, senior disaster risk reduction specialist ug ang ubang representante.
Kahinumduman nga niadtong Septyembre 28 nadawat sa lalawigan ang pag-ila niini tungod sa good governance practices gumikan usab sa maayo nga implementasyon sa mga PRDP Sub-Projects sa probinsya.
Nakuha sa mga hingtungdang benepisyaryo ang pinakamaayo nga grado sa tibuok rehiyon, sa nakalabay nga Operation and Maintenance Audit System (OMAS) sa Regional Operation and Maintenance Audit Team gikan sa DARFO7.
Matud pa sa taho gikan sa PRDP-RPCO7, gikan sa Oktubre hangtod Disyembre 2022, ang 6.94 km farm-to-market road (FMR) sa Dagnawan ngadto sa Dagohoy sa Inabanga nakakuha usab og maayo nga grado sa OMAS.
Duha ka infra sub projects nakakuha og No Objection Letter 2( NOL2) sa National Project Coordination Office(NPCO) sa PRDP, niadtong November 28, 2022 human paglingkod ni Aumentado.
Ang mga sub projects mao ang10.97 KM Rehabilitation sa Campagao-Cabacnitan FMR sa Bilar, kantidad P170.52 M., ug ang 4.74 KM Rehabilitation sa Pondok-Candaigan FMR sa Loon kantidad P91.44 M.
Ang NOL2 senyales nga pwede na iaward ang maong proyekto kay nasulbad na ang depektuso o aberiya sa maong proyekto.
Malampuson nga napahiluna sa PRDP uban sa kagamhanang probinsyal ang mga livelihood ug micro enterprise projects sa nagkalain laing lungsod sa Bohol.
Pagkahuman sa maong pagbisita, nipatighulog ang WB Mission ngadto sa barangay Pondol alang sa site visitation sa Pederasyon sa Gagmay’ng Mananagat ug Mag-uuma sa Loon alang sa pagsuporta ning maong asosayon sa ilang proyekto nga Bahalina de Loon.
Mapasalamaton ang gobernador ngadto sa World Bank tungod sa padayon ang paningkamot sa administrasyong Aumentado-Balite pagpalambo sa Bohol.ALT/PIMO
