By PR | 12:23 PM November 15, 2023
Gipahigayon sa Agricultural Training Institute(ATI), ang Regional Organic Agriculture Quiz Bee uban sa kagamhanang probinsyal pinaagi sa Office of the Agriculturist (OPA) Nobyembre 14 didto sa lobby sa Kapitolyo.
Kabahin kini sa tulo ka adlaw nga kasaulogan sa Organic Agriculture Month sa Nobyembre 13-15.
Lima ka mga tinun-an gikan sa Bohol Island State University (BISU) Bilar campus ang misalmot sa quiz bee.
Si Ashley Dominic Aninipot ang nigawas nga mananaog ug nakadawat unang ganti P10,000, office kits/supplies, medalya ug sertipiko gikan sa ATI.
Ang ikaduhang pwesto naangkon ni Trexie Pilayre ug ang ganti nga P7,000, mga office kits/supplies, medalya ug sertipiko.
Samtang si Reyna Jane Omac maoy nakakuha sa ikatulong pwesto ug ang ganti nga P5,000 ug office kits/supplies, medalya ug sertipiko.
Ang ikaupat nakuha ni Tresha Nadine Pilayre ug ganti nga P3,000, office kits/supplies, medalya ug sertipiko.
Si Jane Lea Magpoc maoy ikalima nga nagpataban og P2,000, office kits/supplies, medalya ug sertipiko gikan sa ATI.
Ang mananaog sa maong quiz bee mao ang opisyal nga representante sa ATI-7 alang sa umaabot nga National Kabataan Organic Agriculture Quiz Bee nga ipahigayon sa kauluhan.
Tumong sa maong kalihukan nga mas palapdan ang kahibalo sa mga kabatan-onang Bol-anon sa kamahinungdanon ang organikong agrikultura aron mapanalipdan ang kalikopan gikan sa paspas nga pagkadaot niini.
Si Ma. Gracia Soliva- Pungay, representante sa ATI-7, nagkanayon nga ang kampanya pag-edukar sa mga kabatan-onan bahin sa organikong agrikultura usa ka kalihukan nga gipatuman sa tibuok nasod.
Aron makabaton og interes ang mga kabatan-onan sa organiko’ng agrikultura, gilusad ang organic agriculture youth grant internship.
Mahimong mosalmot niini kadtong nagpanuigon og 18 kutob 35.
Ang mga interesado musalmot sa 21 ka buwan nga pagtuon, makadawat og P5,000 matag buwan samtang ubos sa pagbansay.
Kung makahimo na sa ilang kaugalingon nga business proposal, P10,000 matag buwan ang ihatag sulod sa tulo ka bulan ug grant nga P150,000 puhunan alang sa ilang business plan.
Kini mao ang ikaduhang tuig sa maong programa. ALT/ PIMO
