By Rey Anthony Chiu | 07:01 PM November 03, 2023
Sa 87 ka mga kanhi rebelde nga mingtahah na og mingbalik sa sabakan sa kagamhanan sa wala pa ang mass surrender niadtong miaging buwan, 93% na kanila ang mingdawat sa immediate assistance nga gisaad sa balaod sumala sa Enhanced Comprehensive Local Integration Program (ECLIP).
Kini maoy unod sa taho sa Office of the Provincial Social Welfare and Development pinaagi ni Carmelita Tecson, sa iyag pagsaysay didto sa provincial peace and order council (PPOC) meeting didto sa Kapitolyo, niadtong mi-aging buwan.
Gikan sa 2018 hangtud sa 2023, sa wala pa madawat ang laing 63 ka mga kanhi rebelde nga mingtahan sa kagamhanan, ang 87 ka mga KR nga karon Kauban na sa Reporma sa Bohol; 46 kanila mga regular nga sakop sa armadong New People’s Army samtang 41 ang sakop sa Militia ng Bayan o, mas nailhang sakop sa masa.
Segin sa balaod sa ECLIP, ang mga mingtahan sa kagamhanan nga kanhi sakop sa kalihukang walhon ug napamatud-an sa mga intelligence units ug reports sa kapolisan, kasundalohan ug mga ahensya nga naglihok batok sa mga rebelde, may madawat nga hinabang sa ilang pagtahan.
Usa ka Joint Army, Police Intelligence Council (JAPIC) ang magpagawas sa ilang hiniusa nga hukom subay usab sa ilang mga kalihukan, nga magtumbok sa ming surrender nga matuod nga armado o aktibong sakop sa kalihukan isip masa, aron mahimo na nga mag mingtahan, masulod sa E-CLIP Program.
Kini human usab nila mahimo ang custodial debriefing sa mingtahan.
Sa Department of Interior and Local Government Memorandum Circular nga naglatid sa guidelines sa pagtagamtam sa E-CLIP, o ang kompleto nga puntil sa hinabang alang sa mga kanhi rebelde ug sa ilang mga sakop sa banay ug mga komunidad nga gipuy-an, 81 na niini ang nakadawat og tag P15 mil nga Immediate Assistance, 40 na usab ang mingdawat sa livelihood assistance gikan sa DILG ug sa Department of Trade and Industry, samtang 80 usab kanila nakadawat og negisyo starter kits ug in kind assistance gikan sa DTI.
35 ka mga kanhi rebelde usab ang nakadawat na og housing assistance gikan sa National Housing Authority ug lima kanila ng may nadawat isip bili sa gisurrender nga armas.
Segun sa E-CLIP, ang mga mingtahan, mahimong makadawat sa P15 mil nga immediate assistance, P50mil nga livelihood assistance alangs a regular nga sakop sa NPA, P21 mil nga reintegration assistance ug doble sa bili sa armas nga gitugyan og balik sa kagamhanan. (PIABohol)
