By PR | 05:24 PM October 23, 2023
Mokabat na sa 38,149 ang nakabenepisyo sa Abante Barangay Service Caravan nga gipahigayon sa kagamhanang probinsyal ubos sa pamunuan ni Gobernador Aris Aumentado.
Ang unang hugna sa maong kalihukan, gisugdan Pebrero 16 ning tuig kutob Agosto 10.
Hiniusang serbisyo ang gihatud sa nagkalain-laing buhatan sa kapitolyo sa mga gikinahanglang serbisyo ug programa ngadto sa kinasuokan bahin sa lalawigan.
Kini subay usab sa tinguha sa gobernador nga mabati ang seryoso nga serbisyo sa kagamhanang probinsyal.
Mokabat sa 20 ka mga dapit ang unang natumbok nga nakabenepisyo ning maong programa sama sa Viilafuerte, Carmen; Campao Oriental, Getafe, San Jose, Mabini; Maitum, Catigbian; Baunos, San Isidro.
San Ramon, Sagbayan; Sohoton, Calape; Imelda, Ubay; Sal-ing, Balilihan; Taguihon, Baclayon; Sudlon, Alicia; Cawayanan, Tubigon; Mayuga, Guindulman; Sikatuna, Talibon; Cantaongon, Loon; Quinapon-an, Antequera; Kauswagan, Trinidad; Poblacion, Danao; Dagohoy, Bilar ug San Agustin, Sierra Bullones.
Gihulagway ni Oscar Valles, Chief of Staff External Affairs ang maong programa atol sa pakighinabi Oktubre 23, nga pinaagi niini “gihatud sa kagamhanan (ang serbisyo) sa ilang tugkaran.”
Kahinumduman nga 61 ka mga kanhi sakop sa CPP-NPA- NDF ang mitalikod sa ilang kawsa ug nibalik sa sabakan sa gobyerno.
Niadtong Oktubre 20, pormal sila nga miatubang kang Aumentado atol sa hiniusang tigom sa PPOC ug PADAC.
Sumala sa testimonyo sa mga Kauban sa Reporma (KR), nakabaton silag pagsalig sa administrasyon ni Aumentado gumikan kay ilang nabati ang kahangawa sa gobyerno ngadto sa ubos nga hut-ong sa katilingban pinaagi sa mga programa partikular ang Abante Barangay Service Caravan.
Nauna nang gipamahayag sa gobernador ngadto sa maong mga benepisyaryong dapit ang iyang seryoso nga pagpadangat sa mga serbisyo ug programa sa gobyerno bisan sa pinakasuok nga komunidad.
Sa talaan sa Local Government Affairs (LGA), nasayran nga sa 20 ka mga lungsod nga naserbisyuhan, 15,761 niini ang nakabenepisyo sa foodpacks gikan sa OPSWD, 8,913 ang nakaambit sa milk feeding sa OPV ug uban pa nga serbisyo.
Ang buhatan sa MOU-GO ug PHO nakaserbisyo sa 7,679 pinaagi sa mga dental, medical check-up ug tuli, samtang 2,522 ang naserbisyuhan sa OPA.
Ang Education Development Center nakapanghatag og school supplies sa 1,234 ka kabataan, ang BEPO-PESO 124 ang natabangan, PLO adunay 154, ug ang PTF-ELCAC inubanan sa mga men in uniforms nakatupi og 782 ka mga lumulupyo samtang padayon sa ilang pagbantay sa palibot.
Ang ROD nga kapartner sa kapitolyo dunay 930 ang nahatdan sa ilang mga titulo.
Sumala sa mga mensahe ni Aumentado, mapasalamaton kini sa tanang nahimong kabahin sa iyang byahe pagkab-ot sa Development Agenda sa Pangagamhanan. (PIMO/ALT)
