By PR | 05:16 PM October 23, 2023
Opisyal nga gilusad ang Miss Universe Philippines (MUP) – Bohol ang pagpangandam sa lalawigan sa tinguha maangkon ang korona sa umaabot na Miss Universe Philippines sunod tuig.
Gihimo ang opisyal nga paglusad sa Henann Resort sa Panglao niadtong Oktubre 22, diin ang mapili ug mananaog morepresentar sa lalawigan sa Miss Universe Philippines 2024 pageant.
“Among girisgo nga kuhaon ang franchise tungod kay nagtuo kami nga ang sunod nga Miss Universe gikan sa Bohol!” matud pa sa beauty queen ang si Wilma Laude Zamora.
Si Zamora, kinsa mao usab ang Mrs Icon World karong tuiga, maoy magsilbing provincial director.
Abagan siya ni Miko Paul Intengan isip assistant director samtang si Rabie Ian Pogoy maoy creative director sa Miss Universe Philippines Bohol.
Si manlalaban Christopher Paragamac maoy legal counsel sa pageant ug si Joseph Rey Rivera ang AP program director.
Matud pa ni Zamora, gikuha niya ang accreditation sa pageant tungod kay nakita niya ang potensyal sa mga Boholana nga makarepresentar sa nasud sa Miss Universe pageant.
Human sa malampusong pag-apil ni Pauline Amelinckx, nga nahimong Miss Supranational Philippines ug gikoronahan isip Miss Supranational 2023 1st-runner up sa Poland, nakahukom ang organisasyon nga ilang pahingusgan ang pagpangandam alang sa sunod tuig.
Ang tumong niini nga usa ka Boholana ang modaog ug morepresentar sa nasud sa Miss Universe.
Dugang pa ni Zamora, magsilbing plataporma kining maong pageant sa paghatag og dungog sa talento sa mga Bol-anon.
Pinaagi niini, kahatagan og higayon ang mga lokal nga designer nga makamugna og sa national costume ug evening gown alang sa representante sa Bohol sa Miss Universe Philippines pageant.
Atol sa paglusad, si Zamora mipirma og pakigtambayayong tali kang Miss Universe Philippines director, Shamcey Supsup-Lee, aron pormal nga ilhon ang Miss Universe Philippines Bohol isip accredited partner ug dunay awtoridad sa pagpadala og representante sa probinsiya alang sa national pageant.
Si Supsup, kanhi MUPh titleholder ug 3rd runner-up niadtong Miss Universe 2011, niingon nga ang pageant usa ka kasaulogan sa “inclusivity” ug “diversity” tungod kay magbukas kini og kahigayonan sa mga Boholana, 18 anyos pataas, nga makarepresentar sa Bohol sa ang Miss Universe Philippines pageant nga sugdan sunod tuig.
Karong tuiga, ang Miss Universe Organisasyon, ubos sa pagpangulo sa bag-ong tag-iya niini nga si Anne Jakrajutatip sa JKN Global Group, gitangtang ang age limit sa ilang pageant ug karon gitugotan na ang mga minyo nga babaye o inahan nga makasalmot.
Matud pa ni Supsup, nakamugna og ideya ang ilang organisasyon sa paghatag og mga prangkisa sa mga probinsiya aron mahatagan og higayon ang mga potensyal nga kandidata nga nagpuyo gawas sa Metro Manila nga makasalmot ug makadaog sa Miss Universe Philippines.
“Di na kinahanglan nga moadto pa sa Metro Manila aron mosalmot sa MUPH screening,” dugang pa niya.
Pinaagi niini, gipasabut ni Supsup nga mahimo sila nga mo-representar sa ilang lalawigan pinaagi sa mga accredited partners.
Nagtutok ang maong organisasyon nga makapahigayon sa opisyal nga screening sa Nobyembre, diin ang finals gikatakda sa Enero 28 sa sunod tuig.
Atol sa maong kalihukan, si Tagbilaran Mayor Jane Yap mihatag sa iyang suporta sa pageant ug ilang adbokasiya sa women empowerment.
Lakip sa mitambong ang nagkalain-laing municipal tourism officers sa lalawigan, sakop sa media, ang Bohol Fashion Designers Circle, Bohol Association of Hair and Makeup Artists and Stylist, Bohol Island State University, ug University of Bohol.
Nakighinabi ang organisasyon sa Miss Universe Philippines Bohol kang Gobernador Aris Aumentado niining buwana atol sa courtesy call aron hisgutan ang potensyal nga pakigtambayayong sa kagamhanang probinsiyal sa pagduso og sustainable tourism ug Bohol isip usa ka UNESCO-designated Global Geopark. (PIMO/GMC)
