By PR | 02:16 PM February 22, 2023
Gipahigayon ang ceremonial signing sa Memorandum of Understanding (MOU) on Joint Investment Promotion nga gipasiugdahan sa Kagamhanang Probinsyal karung adlawa, Miyerkules, Pebrero 22 dinhi sa New Capitol, Tagbilaran City.
Gipanguluhan ni Gobernador Aris Aumentado ang paglagda sa maong MOU, uban sa Executive Director sa Board of Investments (BOI), Atty. Bobby Fondevilla.
Apil usab niini ang Director sa BOI Domestic Investment Promotions Service, Maria Rosario Dominguez, ang Provincial Administrator Aster Caberte ug ang Bohol Economic Development and Investment Promotions Office (BEDIPO) officer-in-charge Maria Fe Dominise.
Tumong sa maong MOU nga mapalig-on ang ekonomiya sa probinsya pinasikad sa EO#292, Administrative Code of 1987 “Board of Investments (BOI) responsible for coordinating the formulation and implementation of short,medium and long term industries plans and promotional investments”.
Sumala pa ni Fondevilla, sa lig-on nga kolaborasyon sa Provincial Government of Bohol(PGBh) ug BOI diha sa hiniusa nga mga aktibidad uban sa promotions niini, iyang nakita nga sumala sa business climate sa probinsya, ang Bohol karon, andam na sa paghost sa nagkalain-laing dagko nga oportunidad dili lang sa lokal nga pamatigayon apil na niini ang foreign ivestments.
Si Aumentado nagpasalamat sa lig-on nga partnership kauban ang BOI, ug ang gobernador, namahayag nga sukad pagsugod sa Abante Bohol nga Administrasyon, anaa na ang pagpangdani og mga mamumuhunan nga ibubo ang ilang kapital dinhe sa probinsya aron mudaghan ang job opportunities ug mulambo ang industriya sa nagkalain-laing sector. Pagdugang ni Aumentado nagwork hard ang iyang administrasyon alang niini.
Si Caberte nagkanayon nga sa pagkakaron hinayhinay na nga ilang naani ang bunga sa ilang intensive promotional campaign ug sa umaabot nga mga adlaw adunay paglusad sa mga job fairs, musulod ang mga locators sa BPO ug ang local players nga mumatch sa demands sa BPO.
Suportado sa Department of Interior and Local Government (DILG) pinaagi ni Provincial Director Jerome Gonzales ang maong kalihukan ,matod pa, tungod sa issuances gikan sa ilang buhatan nagpunting sa pagmugna og Local Economic Development and Investment Office ug ang formulation sa local investment code niini.
Apil sa mga misaksi sa maong MOU mao si Albert Uy, provincial director sa Department of Trade and Industry (DTI) – Bohol Maria Soledad Balistoy ug provincial legal officer Handel Lagunay.
