By Ric Obedencio | 11:46 PM January 22, 2023
Panaghiusa ang mensahe ni Gob. Aris Aumentado nga gipaambit ni Atty. Jun Amora, governor’s office chief of staff, atol sa gihimong “Bugsay sa Pag-abante” nga gitunong sa pagsaulog sa Chinese New Year nga gihimo didto sa Modala Resort sa lugsod sa Panglao, Bohol.
Si Aumentado linawas nga mitambong sa lumba sa dragon boat (friendly race) “Bugsay sa Pag-abante” atubangan sa maong resort kagahapon.
Matud ni Amora nga kinahanglan kaayo ang kahiusahan aron makab-ot ang tinguha sa kauswagan sa Bohol sama sa pagbugsay sa dragon boat aron tulin ang dagan sa tumong.
Sa iyang pamulong usab, si general manager Rommel Gonzales sa Modala Resort nagkanayon nga panahon na nga hatagan sa dakong pagtagad ang turismo pinaagi sa pagmugna sa ubang mga kalihokan ug attraction, sama sa Mandin Mountain Antique Collection ‘N Café Botanical Garden nahimutang sa Mahayag Norte, Catigbian, Bohol.
Mipalanog usab sa iyang mensahe si Bise-Gob. Victor Balite, pinaagi sa representasyon sa iyang anak nga si Deejee Balite, atol sa usa mubong programa.
Si Dr. Doyet Dumaluan, pangulo sa Bohol Paddlers Association, Inc (PDAI) mihatag usab sa iyang mensahi sa kabililhon sa dragon boat racing.
Gitapos an programa ug gisugdan dayon ang dragon boat “friendly” nga lumba, ug human sa pagpasundayag dragon dance atubangan sa mga bisita sa maong resort. (rvo)
