By Helen Castaño | 12:33 PM September 01, 2024
Dako ang kalipay sa magtiayong Tuico nga nakauli na sila sa lalawigan sa Bohol human nangayog tabang.
Matud sa magsisibya nga si Rowena Capistrano sa station DYRF ug Banat News nga iyang nakit-an ang magtiayon nga sila si Danilo ug Dolores Tuico sa daplin sa dalan sa Cebu City niadtong Huwebes sa gabii, Agosto 29, 2024.
Sa pakighinabi ni Capistrano, iyang nahibaw-an nga ang magtiayon diay nangita ni Fr. Ciano Ubod kay mangayo og tabang. Pero si Fr. Ubod anaa man kini sa San Vicente Liloan hinungdan nga mangita nalang sila og lain pamaagi aron madugtongan ang ilang kagutom, ug mailisan og diaper si Nanay Dolores.
Si Nanay Dolores upat ka tuig na maglisod na og lakaw tungod sa iyang sakit sa bato ug diabetis.
Nalusno gani kini daplin sa dalan bisan taliwala sa naglagiting nga kainit.
Gusto sila mupauli sa Bohol para magpaayo. Gidalig kontak ni Capistrano ang iyang amigo sa Bohol nga mao sab ang mingkontak ni Michelle Celecio usa ka Capitol Employee nga mao usab kini ang dali nikontak ni Jason Boquil, executive assistant ni Gov. Aris Aumentado.
Si Boquil maoy nakig-alayon sa PNP ug PCG nga maoy nihatag sa passes aron makauli ang magtiayon balik sa Bohol.
Ming-abot sila sa Bohol 8 PM. Giasikaso sila ni Mr. Boquil sa pantalan.
Gitagaan usab kini og tabang ni Gov. Aris Aumentado sama sa groceries ug wheelchair.
Wala kapugngi ni Nanay Dolores nga muhilak nga nakita niya ang wheelchair tungod kay dugay naman diay kini niya gidamgo nga makabaton og wheelchair sanglit naglisud naman siya sa paglakaw.
Pasado 9:30 PM, gikuha ang magtiayon sa
ambulance sa LGU- Jagna nga gipanguluhan ni Mayor Joseph Rañola. Sila na usab ang mupahiluna kang Nanay Dolores nga ipa-schedule kini sa iyang naputol nga dialysis treatment.
Nagpasalamat ang magtiayon nga Tuico sa tanang mga tawo nga mingpadangat sa ilang tabang.
