By Ric Obedencio | 12:08 AM November 26, 2022
Ang kada molupyo sa barangay Fatima, Ubay, Bohol, kansang mga balay nasugamak sa mapintas nga bagyong “Odette” nakadawat sa tag-P10,000 matag usa, ubos sa Emergency Housing Assistance Program (Ehap).
Gihatag ang ayuda sa Ubay gymnasium sa mga kawani sa Department of Social Welfare and Development (DSWD) sa duolan 500 ka mga molupyo sa maong barangay, matud sa usa ka residente nahinabi ning tagsulat.
Ang pinansyal nga ayuda sa alang sa mga balay nangaguba’ sa “Odette” gipunduhan sa Nationa Housing Authority (NHA), matud sa laing tinubdan.
Si Gob. Aris Aumentado nagpasalamat sa NHA ug iyang giawhag ang mga molupyo sa pagdapat sa maong hinabang aron makatukod o makaayo sa ilang mga panimalayng nasugamak sa bagyo niadtong Disyembre 16, 2021.
Kini iyang gipalanog atol sa pag-apod-apod sa “cash assistance” sa sayong buntag atubangan sa mga benepsiyaryo nga naglinya nang daan aron sa pagpakita sa ilang mga dokumento nga nagpakita nga sila biktima sa bagyo.
Si Mayor Dodong Costan Reyes nagbutyag usab sa susamang mensahe ngadto sa mga benepisyaryo.
Si Lucio Caduldulan, 73, kansang panimalay naguba sa “Odette” nagkanayon nga dako kayo ang kalipay nga dunay tabang gikan sa gobiyerno. Ug sa interview kaniya, siya nagpasalamat kang Aumentado, kang Mayor Reyes ug sa ahensiya sa dakong tabang.
“Nalipay ko kay maka-atup na ko sa akong panimalay,” matud ni Elma Gabisan, usa ka molupyo sa barangay Fatima human sa iyang pagdawat sa P10,000. (rvo)