By PR | 06:21 PM April 27, 2024
Nagpabilin sa unang dapit sa mga pili-onon pagka-presidente sa 2028 si Bise-Presidente Sara Duterte sumala pa sa usa ka survey nga gihimo alang sa unang tulo ka bulan ning tuig.
Sumala pa sa survey nga gihimo sa Oculum Research and Analytics sa unang quarter, halos Katunga sa mga gipangutana pabor kang Bise-Presidente Duterte kinsa nakakuhag 42%.
Si Senador Raffy Tulfo kinsa gikataho nga maoy nag-una sa ubang survey, nakakuha lang ug 17% ug gisundan ni kanhi Bise-Presidente Leni Robredo nga dunay 10%.
Tabla sa ikaupat ngadto sa ikaunom nga pwesto si Senador Imee Marcos, kanhi Senador Manny Pacquiao ug kanhi Mayor Isko Moreno samtang nakakuhag 2% si Senador Robin Padilla.
Si Speaker Ferdinand Martin Romualdez, ang ig-agaw ni Presidente Marcos nga gikabaniog nga interesado usab sa pwesto nga kasamtangang gihuptan sa nauli, duna ray 0.4%.
Sa laing bahin, 14% sa gipangutana sa survey wa pa makahukom kon kinsa ang ilang pili-on samtang 2% nagkanayon nga wa sa mga ngan nga nahisgutan ang ilang nauyonan.
Ang face-to-face interview gihimo ngadto sa 3,000 ka mga tawo sa tibuok nasud niadtong Pebrero 21-29.
Matud pa ni Dr. Racidon Bernarte, pangulo sa research sa Oculum Research and Analytics, ang unang mga pangutana kabahin sa piniliay lakip sa commissioned o binayran nga pangutana samtang ang uban lakip sa ilang research nga regular nilang gihimo.
Makahuloganon ang mensahe sa maong survey tungod kay padayon nga nahiagum ang Bise-Presidente sa negatibong mga balita sa mga nag-unang estasyunan sa TV ug radio ug lakip usab sa social media.
Sa pikas bahin, halos wa hisguti ang Bise-Presidente sa mga taho sa mga higanteng kapunongan sa media.
Si Bise-Presidente Duterte nakakuha sa kinatas-ang marka sa mga opisyales sa administrasyon ni Presidente Marcos. Ang Department of Education (DepEd) diin siya maoy kalihim mao usay labing gisaligan ug gikauyonan sa nagkalain-laing survey.
Sa laing bahin, kusganon nga gikondena sa DepEd ang lain na usab nga trahedya sa kamatayon sa usa ka 14-anyos nga tinun-an sa dakbayan sa Talisay, Cebu.
Gipadangat sa DepEd ang pahasubo ngadto sa banay, higala ug mga isig ka tinun-an niining panahon sa kasubo.
