By Helen Castaño, Marisol Bo-oc | 08:40 PM November 06, 2022
Sa ikatulong higayon, mobisita sa lalawigan sa Bohol ang imahen sa Our Lady of the Rosary ug Mother of Evangelization o nailang Birhen sa Simala.
Ang pagbisita sa imahen sa Birhen sa Simala himuon karong Nobyiembre 7 hangtod sa 11.
Ang Diocese sa Tagbilaran, nangandam usab sa maong kalihukan, diin sugaton sa mga Bol-anon ang imahin sa Birhen sa Simala.
Mogikan ang Birhen sa Simala, sul-ob ang iyang sinina nga gigamit sa iyang paghimog milagro ug ang rosaryohan karong Nob. 7 (Lunes) sa alas 10 sa buntag sa Argao Port sa lungsod sa Argao.
Muabot ang imahe sa Catagbacan Port sa lungsod sa Loon 12 sa udto. Muhapit kini sa San Lorenzo Parish sa Catagbacan, Loon ug Birhen sa Kasilak sa Loon, Holy Cross Parish sa Maribojoc ug Assumption of Our Lady Shrine Parish sa lungsod sa Dauis.
Sa 6 sa gabii, adunay “Welcome Mass” sa Our Lady of Lourdes sa Tagbilaran nga panguluhan ni Bishop Abet Uy. Magsugod ang public veneration alas 7:30 sa gabii.
Sa Martes (Nov. 8) ug Miyerkules (Nov. 9) adunay pagahimuon nga public veneration ug misa.
Sa Miyerkules sa gabii, alas 7:30 ang takna himuon ang grand procession sa Dakbayan sa Tagbilaran.
Sa Huwebes (Nov. 10), pagahimuon ang “Farewell Mass” alas-11 sa buntag. Dayun paingon na sa Catagbacan Port.