By J. Jala | 03:39 PM September 30, 2022
Mingdangup sa Carmen Police Station sa Bohol ang usa ka residente para mangayog tabang para mailhan ang suspek nga nagtigbas sa iyang kabaw.
Dili na makalakaw og tarung ang usa ka kabaw human nga kini gitigbas sa wala pa mailhing suspetsado didto sa lungsod sa Carmen, Bohol kagahapon, Huwebes, Sept. 29, 2022.
Matud sa tag-iya sa kabaw nga si Saturnino Alconera, residente sa Barangay Villahermoso, iya unta itugway ang kabaw pero nakurat siya kay daghan kini og samad.
Sa viral post ni Nash Alconera, makita ang samad sa nawng ug sa 2 ka tiil ug gani ang usa ka tiil hapit na kini maputol.
Tungod sa samad nga naaguman sa kabaw dili na kini makalakaw og tarung.
Suspetsa sa tag-iya nga tingali na-tripan lang ang ilang kabaw kay naay nanglabay kay nag-fiesta usab ang ilang barangay.