By Rey Anthony Chiu | 11:03 AM September 21, 2022

Samtang nagsagubang pa gihapon ang mga tinugyanan sa kasanihan sa Bohol sa dakung hagit sa pagpamakuna sa 35,000 ka senior citizens ug 376,000 ka booster doses, mihinay og saka ang mga nangamatay tungod sa Coronavirus disease (Covid-19) ngadto na sa 710.

Sa labing uwahi nga taho sa Bohol Inter Agency Task Force on the management of Emerging Infectious Diseases (BIATF-EID), gipakita sa Emergency Operations Center, ang base sa BIATF, nga sa Septembre 21, gawas nga miabut na sa 710 ang Bol-anon nga nangamatay sa Covid, mingsaka na usab ang aktibong kaso ngadto sa 76.

Gani, sa 76 nga aktibong kaso, duha niini ang anaa sa tandugon nga kahimtang, 19 niini may lisud nga peruhisyo sa lawas ang gibati samtang ang 43 niini may dyutay nga kahasul sa lawas ang nasinati.

Napulo ug duha lamang sa 76 ka aktibong kaso ang walay gibati sa lawas, bisan pa kon natestingan pinaagi sa Reverse Transcription Polymerase Chain Reaction (RT-PCR) ug miguwang positibo sa sakit.

Subay sa datus ug kasinati-an nga gikan sa Governor Celestino Gallares Memorial Hospital (GCGMH), ang nag-unang tambalanan sa Bohol nga gitagana alang sa mga kaso sa COVID, kasagarang walay bakuna sa COVID, ihatud gayud sa ngadto sa pagkagrabe kon maigo na sa kagaw, ug milagro na lang ang makapalingkawas kanila sa kamatayon.

Sa laing bahin, dakung porsyento usab ang mga matakbuyan sa Covid nga modangat ngadto sa moderate nga hagpat, ang wala mabakunahi o wala makakompleto sa unang duha ka tupokan sa bakuna o primary series.

Sila nga ania niining sitwasyona, maluwas lamang kon may igo nga kwarta nga ikapalit og tambal nga ikadapat kanila.

Matud pa ni Dr Mutya Kismet Macuno, ang hepe sa tambalanan sa GCGMH, ang goberno mogasto og kapin kon kulang P300 mil, aron magtambal sa nagka moderate symptoms sa Covid.

Kini tungod kay may usa ka tambal nga gikinahanglang tomaron sulod sa pito ka adlaw, nga nagkantidad og tag P8,000 ang usa ka buok, gawas pa sa laing mga tambal aron mahupay ang kalisud sa pagginhawa.

Nunot usab niini, giaghat ni Dr. Macuno ang mga katawhan nga nagpadayon nga nanalaw sa bakuna, walay lain’g makapalingkawas sa tawo gikan sa seguradong kamatayon sa Covid gawas sa bakuna ug dugang pagmatngon sa lawas.

Ug alang sa mga nakatibawas na sa primary vaccine series, ang pagpatupok sa booster magpakusog sa nagkahinay nga immunity sa lawas, matud pa ni Dr. Van Phillip Baton sa DOH-7.

Ang mga tinugyanan sa kasanihan karon, nagpadayon sa mga pamakuna, ug tua sila sa mga kalungsuran nga ubos pa gyud ang dagan sa pamakuna.

Tumong sa kagamhanan ang abton sa 90% ang kinatibuk-ang kadaghanon sa mga senior citizens nga labing delikado sa Covid ang mabakunahan hangtud Oktubre 8.

Gawas sa 90% nga senior citizens nga mabakunahan, o 35 mil kanila karon, tuyo usab nga paabton sa 50% sa kinatibuk-ang populasyon sa Bohol ang makakuha sa unang booster shot.

Kini, nga target, magbakuna sa 378 mil ka Bol-anon. (RAHC/PIA_7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: