By Rey Anthony Chiu | 09:51 AM August 31, 2022
Mahibalik sa iyang posisyon isip good standing member sa Social Security System (SSS) ang establisemento o trabahante nga kanhi wala marehistro o mobayad sa iyang kontribusyon o sa sakop niini, kon iya na kining mabayran.
Kini ang pasalig ni SSS Visayas Vice President ug Atty. Alberto Montalbo, ngadto sa mga negosyante nga napalta sa ilang kontribusyon ug nakatala og dili maayong record sa SSS.
Atul sa gihimo nga pagpatuman sa Run After Contribution Evaders (RACE) sa mi-aging semana, gibutyag ni Atty Montalbo nga ilang palisiya nga papason ug wad-on ang mga dautang records sa usa ka kompanya, bisan pa kon kanhi na-amososo kini, nasakpan sa SSS sa iyang salaud batok sa Social Security Law, basta nakakompleto kini og nakaapas na sa balayronon niini subay sa gilagda sa balaod.
Sa laing bahin, inay trangkahan sa SSS ang mga establisemento nga wala magtuman sa ilang mga responsibilidad sa ilang mga sakop, gihatagan pa kini og 15 ka adlaw aron maka-areglo sa ilang kahimtang sa SSS.
Sulod sa 15 ka adlaw, kon wala kami madawat nga kabag-ohan sa sitwasyon, mapugos na kami sa pagpasaka sa sumbong legal batok sa mga nakalapas.
“Kon moabut na sa punto nga may mga kaso na, kasagaran nga kaso, ang desisyon uyon sa SSS subay sa balaod, ug tataw nga mas makagasto pa hinuon ang natungdan nga establismento kon magkinihaay na,” dayag ni Atty matie Ann Chavez, hepe sa legal bureau sa SSS.
Subay sa Social Security law, pugos na ang pagpasakop sa mga trabahante sa SSS, ug gimandu usab sa mga amo sa pagparehistro sa ilang mga negosyo, aron mahiapil ang mga trabahante niini sa mga benepisyo.
Ang mga amo usab, obligado na nga mohatag sa ilang bahin sa balayronon sa mga trabahante ug sa ilang pagkapakyas sa pagbayad sa binuwan nga hatagon, may multa nga magkadako kon dili na mabayran sa amo ang ilang obligasyon.
Ug alang sa mga amo nga may kompormiso sa SSS, gipahinumdom ni Atty Montalbo nga may nagpadayon pa nga programa sa SSS aron masabutan kon unsaon nga mabayran pa ang mga bayronon.
Gitumbok ni Atty Montablo ang Pandemic Relief Restructuring Program, nga mahimong ma-avail sa mga buot mopapas na sa ilang mga utang sa SSS.
May mga sistema usab ang SSS sa pagbayad nga dili na lang iapil ang mga multa, basta na lang mabayran ang kuwang, dugang niya.
Alang sa mga establisemento nga may kasamtangan nga mga problema sa SSS, giaghat sila sa pagsubay niini sa SSS aron mahatagan sa mga sistema sa pagbayad, aghat usab ni Engr Alieta Basubas, SSS Bohol head. (rahc/PIA-7/Bohol)
