By Rey Anthony Chiu | 09:14 PM August 11, 2022
Gibahadan sa National Commission on Indigenous Peoples (NCIP) ang mga lider ug sakop sa indigenous communities (IPs) sa Bohol sa pagtambong sa giingon nga Indigenous Peoples Convention 2022 nga dinhi himoa sa Sitio Pondokan, Anonang Buenavista, Agosto 12.
Kini kay ang kalihukan nga patambongan, wala itugot sa NCIP, ug nga ang gigamit nga institusyon alang sa panagtapok, wala sa listahan sa mga alyados sa usa ka international nga kahugpungan nga gigamit sa suwat-pagaghat.
Tungod niini, nahadlok ang NCIP nga ang pagtambong sa mga sakop sa tribu nga nia dinhi sa Bohol, himoon unya nga pagmatuod nga ang panagtapok, gisuportahan sa mga lumad, ug gamiton sa paagi nga maka-daut unya sa mga sakop sa IPS.
Matud sa NCIP, may nadawat silang mga pangutana kabahin sa giingon nga Indigenous People’s Convention 2022 (IP Convention 2022) dinhi sa Bohol.
Matud pa sa NCIP, may mga gipadala nga mga imbitasyon ngadto sa nagkadaiyang buhatan ug ahensya sa goberno ug mga Indigenous Peoples’ Communities, sa aghat pagtambong sa IP Convention nga mahitabo Agosto 12.
Ang imbitasyon nga gilagdaan sa mga nagpaila nga Captain Rey Valeros Jr., kinsa maoy Luzon convenor, Papa Romeo A Melecio (Visayas Convenor) ug Datu Allan Sumandang (Mindanao convenor), miangkon nga sila sakop sa Institute for Customary Law ug sa International Special Court of Arbitration and Human Rights (ISCAHR)
Apan, matud pa sa NCIP, subay sa research nga gihimo sa Office of Empowerment and Human Rights sa kagamhanan, walay ingon niini nga pundok sa Pilipinas.
Wala, matud pay nakabase sa nasud nga Institute for Customary Law, ug dili usab kini nga grupo, ug nga ang ilang giingon nga kalihukan sa Bohol, kabahin ug sakop sa ISCAHR.
Gitataw sa NCIP nga samtang ang batakang balaod sa nasud nagtugot sa Institute of Customary Law sa paghimog tapoktapok, ang NCIP miangkon nga wala silay kasayuran kabahin sa mga nagpatawag sa tapok ug nagpahimo sa nasampit nga kalihukan.
Giklaro usab sa NCIP nga gawas sa ISCAHR nga tinuod nga anaa, wala malakip sa ilang nalista nga mga institusyon ug mga katambayayong ang Institute for Customary Law.
Ang advisory nga gipagawas sa NCIP Legal Affairs Office, gilagdaan ni Allen Capuyan, NCIP Chairperson ug executive director sa Ending Local Communist Armed Conflict sa nasud. (rahc/PIA_7/Bohol)
