By Rey Anthony Chiu | 07:37 AM January 20, 2022

Sa 76 ka mga tindahan ug establisemento sa Bohol nga nasakpan nga nagpaborot sa presyo ug na isyuhan og Letters or Inquiry (LOI) o Show Cause Orders, 12 na niini ang gipasaka sa ikaduha nga ang-ang. sa paglutos, subay sa proseso nga gilatag sa balaod.

Kini samtang sa kinatibuk-an nga Central Visayas, 84 na ka tindahan ang natunolan sa LOI ug 16 na niini ang milahos na ngadto sa ikaduhang ang-ang sa pagtaral, pinaagi sa pagtunol na sa pormal nga Notice of Violations (NOV)

Sa Cebu, 8 ka tindahan ang nahatagan sa LOIs , samtang may 4 na usab nga npadailos ngadto na sa NOVs.

Matud sa taho sa Department of Trade and Industry Central Visayas (DTI 7), ang 12 ka nakadawat sa (NOVs) gitagalan lamang og 48 oras aron mopatim-aw atubangan sa DTI Adjudication Officer aron mabati sa kagamhanan ang ilang rason.

Dinhi nga dapita, mahimong moangkon na lamang sa salaud ug manumpa nga di na gyud mousab, o magpagahi-gahi aron ipadayon nga husayon sa korte ang salaud.

Labing menos, multa nga moabut sa P5 mil ngadto sa P1,000,000.00 ug mas tutok nga pagtuman sa lagda sa presyo ang mahimong mapilpil sa usa ka establisemento nga moangkon na lang nga naninapi sila sakay sa panahon sa kalisud, subay sa Price Freeze, ug P5mil ngadto sa P2,000,000.00 ang mamulta sa Acts of Illegal Price Manipulation sa Fair Trade law.

Kana ug ang pagka apil sa may dili maayo nga patakaran sa negosyo sa listahan sa kagamhanan.

Kini usab samtang 16 na ka establisemento sa Central Visayas ang gisaka na ngadto sa ikaduha nga ang-ang sa paglutos niadtong mga tindahan nga nagpaburot sa presyo bisan sa paglansang sa presyo sa mga batakang panginahanglan ug nag-unang paliton dala sa kalamidad sa bagyo nga Odette.

Matud pa sa Department of Trade and Industry Central Visayas (DTI 7), padayon silang nagpakatag sa ilang mga tinugyanan aron makaabag sa pagmonitor ug pagpatuman sa Price Freeze nga gipagawas niadtong Disyembre 21.

Dugang sa DTI, hangtud niadtong Enero 14, mikabat na sa 84 ka Letters of Inquiries (LOIs) ang ilang natunol sa mga salawayong establisemento.

Ang LOI maoy una nga ang-ang sa paglutos sa mga manggilapason sa balaod sa presyo.

Kon makadawat sa LOI, may 3 ka adlaw tingtrabaho nga tagal aron ang nakadawat niini nga establisemento, makapatin-aw sa kagamhanan ngano nga mahal ang. ilang presyo, sukwahi sa gilansang nga presyo.

Kon mapakyas sa pagpatin aw ngadto sa DTI sa ilang pagpaburot sa presyo, mosunod na niini, segun sa proseso, ang pagtunol sa Notices of Violation (NOVs).

Subay sa taho sa DTI, paglapas sa Price Freeze Order, ug pagsupak sa Fair Trade Law ang gigamit sa DTI ngadto sa mga retailers sa mga hardware ug gamit ug materyales sa pamanday ug konstraksyon. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.