By PR | 03:05 PM August 06, 2022
PANGLAO- Dili angay hikalimtan ang mga mag-uumang Bol-anon ug kini gipalanog atul sa gihimong Provincial Government Strategic Planning Workshop didto sa Panglao.
Si Board Member Atty. Jamie Aumentado Villamor ming-awhag sa Provincial Tourism Office, Governor’s Office ug mga nagka lain-lain nga buhatan sa probinsya na ipasiguro ug apil sa mga programa ug suporta ang kalabot sa atong mga mag-uuma.
Kini pinaagi sa pagbaligya lakip sa turismo.
“Atong nakita nga nagpadulong kita ngadto sa maayong direksyon sa pagsukod sa atong kalampusan sa turismo dili base sa gidaghanon sa mga bisita, apan sa abilidad sa pagtampo sa lokal nga ekonomiya ug mga benepisyo sa mga lokal nga destinasyon ug komunidad, ” matud ni BM Villamor sa iyang pamahayag.
Matud pa niya nga ang bag-ong administrasyon nagtumong ngadto sa usa ka malungtarong turismo.
“Busa kita nanghinaot nga makakita ug dugang mga programa ug suporta alang sa atong mga mag-uuma dili lamang sa bahin sa produksiyon kondili ato usab silang tabangan sa bahin sa marketing ug promosyon pinaagi sa turismo. Nianang paagiha ma-maximize nato ang pag-uma, dill ra sa pag baligya sa mga produkto pero makataas ug kita pinaagi sa pag-edukar sa atong mga turista kung asa ug giunsa ang mga produkto nga gipatubo ug giani, ug tugotan sila nga makasinati sa samang paagi. Gusto namo nga ang Bohol dili lang makita, apan mabati. Gusto namo nga mabati kini sa tanang mubisita sa Bohol, ” dugang sa batan-ong bokal.
Matud pa ni BM Villamor nga atong hinumdoman nga ang sustainable tourism nagpasabot nga matubag ang panginahanglan dili lang sa mga turista kung dili apil na ang mga Bol-anon ug sa umaabot nga henerasyon.
Tayming sab ang gihimo nga workshop human nakontrobersyal ang Virgin Island, usa ka sikat nga sanbar sa Panglao, tungod sa pagpalabi sa presyo sa pagkaon didto.
Si BM Villamor mao ang nagsuwat sa resolution nga magtukod og task force para imbestigahun ang maong insidente. (BMJV MAO)
