By PIA-Bohol | 11:46 PM September 25, 2024
Aron hiusahon ang tanan nga paningkamot ug mga kaugmaran sa pagtikad sa kawayan ug sa industriya niini, gipasugdan sa Kapitolyo ang organizational meeting aron maoy molihuk alang sa paghimo’g kapunungan nga maglangkob sa tanan nga nanginabuhi sa kawayan.
Didto sa tigum nga gipahigayon sa Provincial Development Assistance Center sa Governor’s Mansion, gipasabut ni Community Development Officer Engr. Vicente Loquellano ang tumong ug tinguha sa Bohol Bamboo Development Stakeholders Association Incorporated, ug usa na niini ang paghimo og one-stop-shop sa tanang nanginahanglan sa kasayuran kabahin sa kawayan.
Giili nga labing taas nga sagbot, ang kawayan dili lamang tinubdan sa pangita ug panginabuhian sa katawhan, apan usab importante nga element sa timbang sa exygen ug carbondioxide sa hangin.
Pananglitan, segun sa pagtuon, ang usa ka lumpong sa kawayanan makapagawas og 35 porsyento nga mas dagahan pang oxygen kon itandi sa susama ka daghan nga lumpng sa mga kahoy.
Tungod niini, ang pagpananum og kawayan, giisip nga us aka maayong paagi sa pagpakunhod sa carbon diha sa kahanginan kay kini masuyop sa mga tanum sama sa kawayan, ug mas mapadali ang lakang sa pagpahinay sa epekto sa global warming.
Gawas pa, ang kawayan, usahay mas maayo pa nga ikapuli sa kahoy ug tabla.
Ang kawayan usab, gawas nga naghatag og pagkaon pinaagi sa ubod niini, ang hingkod nga kawayan, usa s amga labing lig-on nga material alang sa pagtukod og mga balay ug estraktura.
Alang sa mga taga Bohol, ang amakan nga gikan sa kawayan, usa s amga labing inila nga gamit sa konstraksyon.
Apan, matud ni kanhi PENRO Nestor Canda, magkadiin-diin na ang mga tigpang-amakan og pamalit og kawayan kay nihit na ang suplay niini.
Tungod usab niini, nagkadaku ang panginahanglan sa kawayan, mao nga giaghat sa Capitolyo ang pagpananum sa matang sa kawayan segun sa panginahanglan.
Daghan na usab nga mga investors nga nangitag interesado nga mosuplay sa kawayan, bisag sa gawas sa Bohol, dason ni Loquellano.
Ug aron mapahiluna ang tanan, giplano nga hiusahon ang tanan nga stakeholders sa value chain sa kawayan aron mas sayun na ang pagtabang sa industriya, dugang ni Loquellano.
Usa ka Bamboo stakeholders general assembly ang gilaraw aron himoon na nga pormal ang kahugpungan, samtang nagpili na og mga interim nga opisyales aron mapahiluna ang labing una nga bamboo general assembly sa Bohol.
Sa Assembly, tagikon didto ang mga possible nga lakang nga sundon aron ugmaron ang kawayan isip kasaligang ug malungtaron nga kapanginabuhian sa Bohol. (PIABohol)
