By Rey Anthony Chiu, PIA-Bohol | 10:10 PM March 26, 2021

Adbokasya alang sa tulo ka butang ang giingon nga hatagan og tinuyo nga pagpasabut samtang gipaabut ang gatusan ka mga siklesta ang modagsang sa kadalanan sa syudad ug mga kalungsuran aron makighiusa sa tibuok kalibutan alang sa Earth Hour 2021 60+.

Matud pa ni Jude Ybas, usa sa mga haligi sa Earth Hour Bohol, ang pagpatunhay sa kalikopan, pagpalapad sa responsable nga pagbisekleta ug ang pagpaambit sa dalan maoy kampanya nga hingusgan sa kalihukan nga mahitabo Sabado sa gabii, gikan sa alas 7:00 sa gabii.

Niining higayona, ang mga balay sa mga misuporta sa kalihukan, tuyo nga magpawong sa ilang mga suga gikan sa usa ka oras pataas.

Kini samtang ang mga siklista mangampanya usab sa mga kabalayan sa pagpawong sa ilang mga suga aron makapahuway ang mga power grids kang kinsang supply sa koryente gikuha gikan sa renewable energy sa kalikopan, ug sa mga generators nga nagbuga og aso nga makadaut sa kalikopan.

“Sa mga nag una nga lugar ug mga nasud sa katuigan, ang Earth Hour nagpakita sa pagpawong usab sa mga suga sa kadalanan, kabalayan, mga pangpubliko nga lugar, aron ipadayag ang kamatuoran sa nagkahurot nga kahinguhaan ug ang krisis sa nagkausab nga panahon,” saysay ni Ybas.

“Karong Marso 27, 2021, gi-awhag namo ang tanan sa pag-palung sa ilang suga ug usa ka oras o sobra pa sugod 7:00 sa kagabhi-on isip pakighiusa sa pagsaulog sa EARTH HOUR 2021 ug pag-amoma sa atong nag-inusara nga kalibutan,” panawagan ni Ybas, kinsa nakig-uban sa Bol-anon Cyclist alang sa tinuig nga kalihukan alang sa kalibutan.

Ang Earth Hour, dili lamang us aka oras alang sa planeta- himoon nato kini nga kalihukan alang sa atong kaugmaon, kining atong buhaton, dili lamang timaan sa pagsuporta, kon dili manghinaut kita nga kini mamahimong sinugdanan sa dinalian nga kabag-ohan alang sa malungtaron nga kalibutan, dugang niya.

Gawas sa adbokasya sa kalikopan, nagkasamot na ang atong pagpanghingusog sa kampanya sa pagpaambit sa kadalanan.

“Share the road,” kay sa panahon nga nagkadaghan na ang bikers, atong ipakita sa mga motorista nga apil kita sa paggamit sa kalsada.

“Dili lang kay mga atlera ra, karong panahuna sa pandemya, anaay nag bike to work, mga estudyante nga maghatud-kuha sa modules, mga sports enthusiasts kansang linya sa sports gidili pa nga himoon, bisekleta ang kadulngan isip sports sa pagpasingot,” niya pa.

Mohangyo ta sa mga motorist, makigamit kita sa kalsada, unta lugara kita og dyutay, dili kay hadlokon ug tuyoan nga ibutang ta sa kalisud, sambat sa usa usab ka biker nga mokuyog sa Earth Hour Ride.

Unta ilang mahunahuna nga ang biker, usa usab ka tatay, usa ka pamilyado nga may asawa ug anak nga gipakaon, may igsoon nga mangita ug masakitan usab kon madisgrasya, dugang niya.

Hinuon, aminado usab ang mga haligi sa Earth Hour 2021 Ride nga daghan pa usab nga angayan nga kat-onan ang mga siklesta, ilabi na kadtong bag-o lang nga nahungog sa pagsikad.

Bike responsibly, aghat ni Ybas.

Sa mga naka apil na sa mga rides sa mga nangaging tuig, kini gihapon ang atong awhag, aron atong ipakita ug ipasunod sa mga bag-o pa lamang, nga ang pagbisekleta dili mahimong sagolan og garagara sa karsada. Disiplina ug responsable nga pagsikad aron respetohan usab, dugang awhag ni Ybas.

Sukad niadtong 2011, ang Earth Hour night Ride sa Bohol, usa usab ka paagi nga mag-aghat sa tanan nga buot mosalmot apan walay bisekleta, sa paghimog paagi nga mamenosan ang konsumo sa koryente pinaagi sa pagpawong sa mga suga nga dili gikinahanglan, sa pagpanihapon sa gawas aron mapawong ang suga sa balay, ug sa paghimog kalihukan nga dili mogamit sa koryente.

Gawas sa Tagbilaran, may mga dinungan nga night rides sa mga siklesta sa mga kalungsuran sa Bohol. (rahchiu/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.