By Rey Anthony Chiu | 07:45 AM July 07, 2022

Dili na masayon-sayon pa ang pagpasulod sa mga manok dumalaga, sonoy igbubuwang, itik, pugo, salampati, mga binuhi ug ihalas nga langgam, piso nga bag-ong pinusa, itlog papusa-on, iti sa manok pang abono, bisan pa kon magagikan sa mga lugar nga wala pay kaso sa Avian Influenza nganhi sa Bohol.

Makasulod, apan dili ingon kaniadto nga wala nay kuskos-balungos, pasabut sa mga tinugyanan nga sakop sa Bohol Task Force batok sa Avian Influenza (AI).

Ang AI, o mas nailhan sa ngalan nga Bird Flu, hilabihan ka mananakod nga sakit sa manok nga dala sa Influenza A nga virus.

Ang bird flu, may kapasidad nga mopuo sa kinatibuk-ang populasyon sa mga manok, kon kini makasulod sa usa ka lugar.

Ang Bohol adunay binilyon nga pamuhunan sa pangmanokan, mao nga gikinahanglan kini nga mapanalipdan.

Niini, ang pagpasulod sa Bohol sa nasampit nga mga manok o produkto gikan sa manok, gikinahanglan na nga kuyogan sa mga dokumento aron makalabang sa mga nagbantay sa mga utlanan.

Gikinahanglang ang magdala sa nasampit nga manok, itlog, salampati, pugo nga buot mopasulod dinhi ang Veterinary Health Certificate (VHC) nga gikan sa Provincial Veterinarian diin nagasukad ang mga ipasulod nga manok o langgam.

Gawas sa VHC, magkinahanglan usab siya og Veterinary Shipping Permit nga gikan sa Bureau of Animal Industry o deputized veterinarian Quarantine Officer.

Ikatulo nga dokumento mao ang negatibo nga test result sa mga gibitbit nga mananap sama sa manok igsasabong: labing menos 6 ka buwan gikan sa pagkuha sa sample alang sa pagpalaboratoryo, labing menos 28 ka adlaw gikan sa pagkuha sa samples gikan sa mga piso nga gipapusa, 14 ka adlaw gikan sa pagkuha sa samples sa mga itlog papusa-on ug labing menos 7 ka adlaw gikans a pagkuha sa sampls sa mga dumalaga.

Ikaupat nga dokumento mao ang Certification of AI-Free Status gikan sa Provincial Veterinarian ug nga kini mag-unod nga nagpamatuod snga walay nahitabo nga AI outbreak sa umahan diin nagagikan ang mga nasampit nga langgam, manok o hayup.

Ikalima mao ang Local Transport permit nga gipagawas sa Department of Environment and Natural Resources alang sa ihalas ug sa binuhi nga manok.

Ang nahisgutan nga mga pamaagi aron makalabang ang mga nasampit nga manok, itlog, itik, pugo, langgam o iti niiini, maoy usa sa mga unod sa Evecutive Order No 5 nga gipagawas ni Gobernador Erico Aristotle Aumentado nga iyang gilagdaan sa unang adlaw sa iyang paglingkod isip gobernador, Junyo 30. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.