By Rey Anthony Chiu | 12:13 PM July 07, 2022

Padayon pa nga luwas ang kinatibuk-ang Rehiyon 7 sa African Swine Fever (ASF), ang sakit sa baboy nga dala sa kagaw ug giilang hilabihan ka mananakod sa mga baboy ug gani, mahimo na gani nga mosakay usab sa tawo ngadto sa laing mga baboy.

Kini maoy gipadayag ni Department of Agriculture Regional Executive Director Joel Elumba, ug kang kinsa nga kasayuran, mismo nanagikan sa Regional Veterinary Quarantine 7 sa Bureau of Animal Industry (BAI) .

Ang Regional Veterinary Quarantine sa BAI sa Region 7, maoy tigkompirmar sa mga samples sa mga gidudahang mga baboy nga nasakit sa gikahadlokang sakit sa baboy.

Kini usab nga mga samples nagagikan sa nga Provincial Veterinary Offices sa mga lalawigan ug sa mga beterinaryo nga anaa sa mga local government units.

Ang pagpatin-aw nga giluwatan sa DA Regional Office 7 dala na usab sa sayop nga deklarasyon nga gibungat sa usa ka reporter sa Super Radyo sa Cebu sa iyang taho sa Dobol B TV niadtong Hulyo 6.

Gitaho, matud pa ni reporter Allan Majait, nga may kaso kuno sa African Swine Fever sa syudad sa Dumaguete.

Kon diin man nakuha ni Majait ang iyang gigamit nga taho, mipahinumdom ang DA 7 nga ang tanan nga opisyal nga pahibawo kabahin sa African Swine Fever, kini unod gayud sa usa ka dokumento nga pirmahan sa mga local chief executives o mayor o gobernador sa usa ka lugar diin nakompirmar ang sakit, ug pamatud-an usab kini sa Regional executive Director.

Nunot niini, gipasalig sa DA-7 nga gipahimutang na ang hugot nga mga pagbantay aron walay makalabang nga sakit sa mga utlanan sa rehiyon.

Dugang pa, mihangyo ang DA-7 ngadto sa mga namuhi og baboy ug nagdumala sa mga baboyan lakip na ang publiko sa pagtabang aron mapatuman gayud kanunay ang biosecurity measures aron kapanalipdan ang rehiyon batok sa ASF.

Ug kabahin sa sayop nga taho, naglaum ang DA-7 nga kini mahimo-an og pagpasabut o pag-tul-id sa nasampit nga media outlet, program ug reporter, aron masabtan sa kadaghanan. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.