By Rey Anthony Chiu | 10:28 AM May 27, 2022

Dugang abag pahuwam alang sa mga micro, small ug medium enterprises nga napalukapa sa pandemya ang gipalakaw karon sa Department of Trade and Industry (DTI) ug sa tigpundo niini nga Small Business Corp.(SB Corp).

Gipadayag isip Rise UP, ang programa sa pahuwam bukas ngadto sa tanang MSME nga nahilambigit sa negosyo ug turismo, nga nangandoy pa nga patas-on ang ilang pagpahiuli gikan sa pagkalup-og dala sa pandemya ug nga katalagman nga ming-tamparos sa Bohol.

Tumong sa “RiseUP Program ang pagpalig-on pa sa mga kalampusan sa mga MSMEs nga nakalahutay sa duha na ka tuig nga pagserbisyo sa mga konsumidor taliwala sa Covid-19 ug sa mga katalagman ug pagsuway. Buot nato sila nga tabangan aron makapalig-on pa sa ilang paglahutay nga napakita na ug samtang dungan kitang mobangon human sa pandemya,” dayag pa ni DTI Secretary Ramon Lopez.

Ilawom sa RiseUP Program ang Micro-Multi-Purpose Loan, SME First Time Borrowers u gang MSME Suki MultiPurpose Loan.

Sa Micro-MultiPurpose Loan, labing dako nga mahuwaman ang P300,000 basta nakapadayon sa negosyo sa labing menos us aka tuig, base usab sa kantidad sa puhunan, may 12% nga interes ug pwedeng bayaran sa tulo ka tuig.

Alang sa SME First Time Borrowers, mahimong makahuwam og taman sa P2 milyones, 50% sa puhunan ug kabtangan, o 15% sa halin sa mi-aging tuig subay sa resibo nga ipa-ukay sa BIR, basta ang negosyo nagpadayon sulod na sa tulo ka tuig.

Sa binuwan nga bayaran sulod sa tulo ka tuig, 12 % lamang ang interes niini, segun pa sa SB Corp.

Sa SME MultiPurpose Suki Loan, makahuwam og taman sa P5 milyones sa yano nga loan o P10 milyones sa loan nga adunay Real Estate Mortgage nga mahitabo.

Sa tagal nga tulo ka tuig, ang mga may record na nga huwam sa SB Corporation, makahuwam pag usab sa 8% ngadto sa 12 % nga interes, ang kadak-on sa huwam magdepende sa 15% sa halin sa milabay nga tuig o 50% sa mga kabtangan.

Dinhi, ang kantidad sa katapusang loan, maoy kantidad sa mahuwaman, kuhaan sa nahibiling wala pa mabayri nga huwam, 15% sa halin nga naa sa resibo sa imaging tuig ug 50% sa kantidad sa puhunan o kabtangan nga iagig collateral.

Dinhi usab, ang nga negosyo nga anaa sa industriya sa turismo mahimong makahuwam sa walay collateral ug walay interes nga pahuwam ilawom sa programang RiseUp Turismo, matud sa SB Corp.

Ubos sa programa, ang mga MSMEs nga nahilambigit sa kalihukan sa turismo, bisan og dili accredited sa Department of Tourism, mahimong makahuwam og taman sa P5M nga bayaran sulod sa pat ka tuig ug palugit nga moabut sa 24 ka buwan.

Sa laing bahin, ang RiseUp Tindahan bukas na usab sa mas daghang MSMEs nga naglihok sa paghatag sa nag-unang panginahanglanon, paghimo niii ug pagpang-apud-apod sa mga pagkaon.

Makaapil niini ang mga tag-iya sa sair-sari stores, groceries, supermarkets, dealers ug distributors, diin makahuwam sila gikan sa P10,000 ngadto sa P5 million sa termino nga bayaran sa tulo ka tuig ug palugit nga 12 ka buwan.

Sa mga interesado nga moapply, bisitaha ang https://brs.sbcorp.ph ug log in o paghimo og account; dayon i-click ang “Apply for a Loan,” pilia ang RISE UP Multi-Purpose Loan sa mga pili-anan ug kompletoha ang registration form dayon i-upload ang mga gikinahanglang dokumentos sama sa Government-Issued ID, Barangay Certification alang sa huwam nga dili molapas sa 100T, BMBE Certificate o Mayor’s Permit alang sa huwam nga sobra sa 100T.

Gikinahanglan usab ang mga hulagway sa negosyo nga gipadagan ug mga kabtangan niini, ug iapil ang corporate documents sa mga korporasyon kon gikinahanglan.

Human niini, iduso pinaagi sa pagpindot sa “Submit” aron matapos ang proseso sa application.

Alang sa dugang kasayuran, pakisayud gikan sa communicationsteam@sbcorp.gov.ph. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.