By Rey Anthony Chiu | 10:31 AM May 27, 2022

Gikalipay sa Department of Science and Technology (DOST) Bohol Provincial Science and technology Center (PSTC) ang kalampusan sa usa sa ilang mga natanyagan sa programang Grants In Aid (GIA) nga mingpadaug sa entry sa us aka tunghaan sa Jagna, sa Digital Poster Session atul sa 2022 Visayas Regional Scientific Meeting.

Gikuha sa Central Visayas Institute Foundation (CVIF) sa Jagna, ang ika tulo nga pwesto sa National Academy of Science and Technology Philippines (NAST PHL) Digital Scientific Poster Session sa bangga atul sa kombensyon niadtong Abril 28-29, 2022 sa Visayas.

Ang scientific poster entry sa CVIF nga giila nga, “Marine Molluscs in Jagna Bay, Bohol Sea,” usa ka biswal nga pagpamubo sa mga unod sa natanyag nga pagtuon sa CVIF nga gipundohan sa DOST.

Ang pagtuon nga gihimo sa mi-aging tuig, giulohan og, “Studies and Creation of the Gene Bank of Phylum Mollusca from the Bohol Sea.”

Gitapok sa CVIF ang ilang gikaykay nga mga kasayuran nga mahimong magamit sa mga tigpanday og balaod, samtang kini maghatag usab og sinugdanang kasayuran alang sa mga marine scientists ug mga pharmaceutical researchers lakip na ang mga magtuki sa susamang mga pagtuon.

Lakip sa mahatag sa pagtuon nga gipundohan sa DOST ang kasayuran kabahin sa basehan sa paghimo og Food Safety Assessment pinaagi sa pagtuki ug pagpanuki-duki sa kalidad sa heavy metal nga anaa sa mga kinhason, pamilya sa mga nokos ug kugita, katlong, buskay ug mga kinhason nga sama sa bugjong, nga makit-an sa Jagna Bay.

Kini aron paghatag og kasegurohan sa luwas nga pagkaon ilabi na sa mga mangihasay nga nanimuyo ug nagkaon sa mga kininhasan sa Jagna ug silingang kalungsuran.

Ang tinuig nga indigay sa scientific poster atul sa mga sesyon nagpadayag sa labing bag-o nga mga resulta sa mga pagpangduki-duki nga gihimo sa mga misalmot nga higher education institutions, research centers, ug mga ahensya sa kagamhanan.

Karong tuiga, ang, NAST PHL mipili sa PAGTANAW 2050 isip maoy gitutokan sa 2022 Regional Scientific Meetings (RSM) aron ipakayab ang kasayuran ug palihokon ang komunidad sa Science, Technology, ug Innovation (STI) paingon ngadto sa pagpangandam sa kaugmaon ug malungtaron nga kadagatan nga magbuhi ug magpakaon sa katawhan nga magpatunhay usab sa ilang kahinguhaan. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.