By Rey Anthony Chiu | 10:35 AM February 02, 2022

Sulod sa tulo ka adlaw, walo ka Bol-anon ang mitahan sa ilang hinuwamang kinabuhi, tungod sa coronavirus disease (Covid-19).

Segun sa taho sa Bohol Inter Agency Task Force on the Management of Emerging Infectious Disease sa COVID-19 Daily Update niadtong Enero 28, mikabat na sa 594 ka Bol-anon ang naangin sa hilabihan ka mananakod nga sakit, nga nakadagsang sa Bohol sukad sa Abril sa imaging tuig.

Apan, human sa tulo ka adlaw, o Enero 31, napakita sa Emergency Operations Center sa Provincial Vaccination Operations Center nga anaa na sa 602 ka Bol-anon ang namatay, and walo ka kamatayon natala sulod sa katapusang tulo lamang ka adlaw.

Kon sumadahon, sa milabay nga tulo ka adlaw, kapin sa duha ka Bol-anon ang makutlo sa Covid.

Niini, sobra sa katunga na sa mga kalungsuran sa Bohol ang nakaangkon og sobra sa 10 ka residente ang nangamatay tungod sa gikaintapan nga sakit-mananakod.

Tagbilaran pa gihapon usab ang may gitala nga labing daghang nangamatay sa 11 ka residente, bisan kon dili pa mapiho kon kini tungod ba kay dinhi makit-an sa syudad ang labing daghang tambalanan nga kapili-an, mao nga dinhi na namatay.

Sunod sa Tagbilaran and Ubay nga may 31 ka residente nga namatay, 22 ang sa Calape samtang susama nga 21 na ang namatay sa Dauis ug sa Talibon.

Kawhaan (20) na usab parehas ang namatay sa Carmen, Loon ug Guindulman, napulo ug walo ang nasayang nga kinabuhi sa Maribojoc, 17 ang sa Jagna ug 16 ang sa Tubigon.

Pareho nga may 15 na ka namatay sa Panglao ug Inabanga, samtang parehang may 14 na ang nangamatay sa Covid sa Lila ug Candijay.

Napulo ug tulo na usab ang namatay sa Valencia ug Trinidad, 12 sa Garcia Hernandez ug Pilar samtang 11 ang namatay sa Baclayon, Sierra Bullones ug San Miguel.

Napulo na usab ang namatay sa Bilar ug sa Balilihan.

Sa ilang taho sa BIATF sa Enero 31 sa alas 8:00 sa buntag, natala pa gihapon sa Bohol ang 1,125 ka aktibong kaso sa Covid subay sa kompirmado nga resulta sa Reverse Transcription Polymerase Chain Reaction (RT-PCR)

Kini na ang ika tulo ka adlaw nga ang Bohol mitala og sobra sa usa ka libo ka aktibong kaso, subay sa taho sa BIATF.

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: