By Rey Anthony Chiu | 11:19 AM October 26, 2021
Hangtud niadtong Oktubre 22, mikamang na ang kadaghanon sa mga Bol-anon nga nakakuhag kompleto nga doses sa bakuna sa coronavirus disease (Covid-19) ngadto sa 235,913.
Kon tumong sa Bohol ang pagkab-ot sa kompleto nga panalipod sa sakit nga Covid-19 pinaagi sa herd immunity, matud sa mga batid sa sakit nga mananakod, gikinahanglan nga mabakunahan ang 70% sa kinatibuk-ang populasyon.
Sa datus subay sa labing bag-o nga census sa Philippine Statistics Authority, ang Bohol, may kinatibuk-ang populasyon nga 1,394,329.
Ang 70% niini, anaa sa 976,030.
Kon gamiton ang PSA data, ang 235,913, anaa pa sa 16.92 % nga vaccination accomplishment.
Ug kon may ingon niini kadaghan na ang natupokan sa duha ka doses sa bakuna batok sa Covid, lain pa nga 289,358 ka mga Bol-anon ang nakakuha na sa unang tupokan, nga katumbas na usab sa laing 16.44%.
Kon magpadayon ang pamakuna, human sa usa ka buwan, makab-ot na sa Bohol ang 33.36 % nga vaccination accomplishment.
Segun sa kasayuran nga gipaambit sa Emergency Operations Center (EOC) sa Bohol Inter-Agency Task Force (BIATF) on the management of Emerging Infectious Diseases, kasamtangan nga nadawat na sa Bohol ang 740,932 ka doses sa mga bakuna.
Niini nga kadaghanon, natupok na hangtud niadtong Oktubre 22 ang 465,271 ka mga doses.
Kasamtangan nga may 275,661 ka mga doses sa bakuna nga magamit pa sa Bohol sa sunod nga mga adlaw, subay sa kwentada sa datus gikan sa EOC.
Sulod sa usa ka buwan, kon kompetohon na ang ikaduhang tupokan sa mga una nang nabakunahan, mabinlan na lang ang Bohol og 46,303 ka mga doses.
Hinuon, sa usa ka buwan, gipaabut pa sa Bohol ang dugang mga bakuna nga moabut, matud pa sa EOC. (rahc/PIA-7/Bohol)
