By Rey Anthony Chiu | 05:40 PM October 26, 2021

Usa ka P1.5 bilyones nga proyekto nga kanhi, damgo lamang sa mga Bol-anon nga mag-uuma sa Danao, San Miguel, Trinidad ug Bien Unido ang himoan og groundbreaking ceremony Oktubre 27, 2021 didto sa Tomoc, San Miguel, Bohol sa may alas 2:00 sa palis.

Mismo si National Irrigation Administration Administrator retired General Ricardo Visaya kauban ang mga labaw nga opisyales sa NIA Central Office ug si Deputy Administrator for Administration and Finance Officer In Charge Freddie Toquero ug mga opisyales gikan sa Manila, personal nga motambong sa seremonyas pagsugod sa Bohol Northeast Integrated Irrigation System (BNIIS).

Ang BNIIS nagtumong nga makahatag og tinubdan sa patubig sa 2,133 ka ektarya nga mga basakan sa mga nasampit nga lungsod ug gilauman nga direktang makahatag og benepisyo sa 683 ka mga mag-uuma.

Proyekto nga una na nga nahimugso sa hunahuna ni kanhi Kongresista ug Gobernador Erico Aumentado, kang kinsa nga mga termino sa pangalagad, natala ang katukuran sa mga minilyon nga imprastraktura pagsuporta sa panguma, ang BNIIIS, magkinahanglan sa katukuran sa usa ka catch dam, katukuran sa Cambangay Catch Dam, ug pagsumpay sa upat ka diversion dams.

Mahiusa na sa proyekto sa BNIIS ang Isumod Diversion Dam, Cambangay ug Ipil Diversion Dam, Hinlayagan Ilaya Diversion Dam ug Kinan-oan Diversion Dam.

Tungod niini, gilauman nga mas mapalapad pa ang mga basakan nga matubigan, mapadaghan pa ang cropping nga moresulta unya sa mas daghang aron makahatag og mas episyente, kasaligan ug malungtaron nga serbisyo sa mga mag-uuma dinhe.

Gilauman nga motambong usab sa kalihukan ugmao ang upat ka mga mayor: Judith Cajes sa Trinidad, Jose Cepedoza sa Danao, Virgilio Mendez sa San Miguel ug Rene Borenaga sa Bien Unido.

Gawas sa mga mayor, gilauman nga motambong si Kongresista Aristotle Aumentado, Gobernador Arthur Yap, mga representante sa mga dams, si Kapitan Jesseril Intina sa Tomoc, matud ni Engr Wilson Lopez, Regional manager sa NIA Region VII. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: