By Rey Anthony Chiu/PIA-Bohol | 12:15 PM September 08, 2023
Duha ka mga dayo nga street dancing contingents uban sa duha usab ka school based contingents ang mosalmot sa Salamat Festival agi og paghalad sa pasalamat ngadto sa patron San Nicolas Tolentino sa Dimiao, Septembre 10.
Ang mga dancing contingents sa lungsod sa Panglao ug lungsod sa Valencia ang mga dayo nga dancing contingents nga makigduyog sa mga taga Dimiao sa pagsaulog, paghalad ug pagpasalamat sa patron sa lain na usab nga mabulokon nga tuig.
Kini maoy gibutyag ni Mayor Randolph Ang, kinsa maoy nanguna sa pagpahigayon sa mga kalihukan sa pista sa patron San Nicolas, ug sa pagpahiluna sa mga kalihukan nga amgaganoy sa katapusang tulo ka adlaw sa nobenario nga gipasubay sa tema ug taglines sa lungsod nga town of music, beauty and glee.
Ang Salamat Festival sa Dimiao, nakagikan sa Saulog, Halad ug Pasalamat ngadto sa Patron: San Nicolas Tolentino
Sa ikaduha nga tuig human gibalik ang Salamat Festival Streetdancing human sa pandemya, gipadayag sa mayor nga ilang gipaningkamotan nga ikapabalik ang bongga nga kapistahan, labi na kay buot na sa mga opisyales nga ipahibaw nga bukas na ang Dimiao sa kinatibuk-ang ekonomikanhong kalihukan.
Kini usab human gibuksan sa mga tinugyanan ang mga kalingawan sa matag adlaw nga nobenaryo sa patron pinaagi sa Food Bazaar ug Night Market nga giapilan sa 35 ka mga exhibitors ug traders, taho usab ni Tourism ug Information Officer Virgilio Laguitao.
Dugang sa mayor nga ilang gilaraw nga himoon na nga regular ang Food Bazaar ug Night Market, aron usab kahatagan og higayon ang mga gagmay nga mamumuhunan sa pagpatigayon aron hinay nga makabarug gikan sa kalisud sa pila ka tuig nga walay ekonomikanhong kalihukan.
May napahimutang usab nga mga night performers sa lugar diin nahimutang ang Food Bazaar.
Sa katapusang upat ka aldaw nga modangat na ngadto sa pista, ang DepED ang magpahigayon ug gabii sa huni ug awit Septembre 7, sundan usab sa San Nicolas Academy ug sa Parish Pastoral Council sa Septembre 8.
Sa Septembre 9 ang sponsor mao ang LGU Dimiao ug napaabut ang gabii sa kaanyag nga mahimong saksihan diha sa Dimiao Cultural Center.
Sa Septembre 10, ang kapistahan, masaksihan ang Salamat Street Dancing Parade ug Rituals samtang sa pagkagabii, ipahigayon ang concert sa Missing Felimon, mismo sa Church Plaza and grounds. (rahc/PIA-7/Bohol)
