By Rey Anthony Chiu | 10:46 PM October 15, 2021

Hinabang agi og hulip sa nawala nga sweldo sa inadlaw nga trabaho nga napalta tungod sa sakit o pagkwarantina, kini maoy haylo sa Social Security System (SSS) niining padayon nga hulga sa coronavirus disease (Covid-19).

Dili man tugbang sa inadlaw nga kita, apan mas maayo na lang kay sa wala.

Kini maoy gipadayag ni SSS Bohol Branch chief Engr. Alieta Basubas, ngadto sa mga taga Bohol nga karon nagpabiling wala magpasakop sa SSS, o naundang sa pagkasakop tungod sa pagkataktak sa trabaho.

Didto sa Kapihan sa PIA nga gihimo sa milabay nga mga semana, gibutyag sa babaye nga hepe sa SSS Bohol nga gidoble pa nila ang ilang mga paningkamot karon nga makuha kadtong mga wala nay coverage sa SSS, tungod kay mahimo nga may doble nga hinabang nga makuha sa higayon nga ma-igo sa Covid.

Gawas sa pugos nga pagpasakop sa SSS sa mga trabahante, kadtong mga kapikas nga naa lamang sa balay ug kadtong napaundang sa trabaho, mahimo pa gihapon silang magpasakop, ug kay masakop na, mahimong makakuhag benepisyo nga ikahulip sa mga panahon nga wala gyu’y makapkap.

Isip sakop sa SSS, mahimo na nga makagawat og benepisyo sa higayon nga masakit, manganak, moretiro, mabaldado sa trabaho, mamatay, abag sa pagpalubong sa sakop ug abay sa panahon nga nawad-an sa trabaho, matud ni Engr Basubas.

Niining nagpadayong hulga sa Covid nga magpa-palta sa trabaho bisan kon walay gibati apan kinahanglang i-kwarantina, o ma-ospital tungod sa simtomas, matud sa SSS, may ikatabang sila.

Kon sa higayon nga masakit, adunay inadlaw nga cash nga tabang segun sa pila ka adlaw nga wala makatrabaho sa labing menos 4 ka adlaw, basta nakabayad sa tulo ka butangan sulod sa 12 ka buwan sa wala pa masakit o mabaldado.

Ang hinabang, pasabut sa SSS, katumbas sa 90% sa average daily salary credit (ADSC)

Aduna usab makuha nga Unemployment Insurance o Involuntary Separation Benefit sa mga sakop nga nataktak sa trabaho.

Kini us aka cash benefit sa mga may SSS Coverage, apil ang mga katabang nga gipapha sa trabaho tungod sa pagpamenos sa trabahante, pagsira, pagkapordoy ug pagdaginot.

Hinuon, ang sakop nga hatagag hinabang kinahanglang wala pa mo 60 anyos, nakabayad sa labing menos 36 ka binuwan nga hulogan, ug ang 12 ka buwan kinahanglang nasulod sa 18-ka buwan sa wala pa siya mapapha sa trabaho.

Hinuon, walay labut niini kadtong mismo mipili sa pag-undang sa trabaho, o gitaktak kay may grabing pagkasala, wala pagtuman sa balaod, pagtalikod sa trabaho, pagpanglimbong ug uban pang dili angay kabayran.

Hinabang nga katumbas sa doble sa iyang Average Monthly Salary Credit ang madawat.

Ug kon maospital, mahimo usab nga kaabagan sa Employees Compensation Commission ug posibleng makadawat og labing dako, P10 mil, butang nga kon ikuyog sa tabang sa SSS, tawagon na og double recovery, matud ni Engr. Basubas (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.