By Rey Anthony Chiu | 11:51 AM September 23, 2021

Dili na kinahanglan pa nga ang mga mild nga kaso sa coronavirus disease (Covid-19) nga dalhon pa sa ospital.

Kini maoy unod sa Executive Order No 45 nga gipagawas sa Kapitolyo human lagda-i ni Gobernador Arthur Yap niadtong Septembre 7, 2021.

Sa section 1 paragraph V sa nahisgutan nga bag-ong polisiya gikan sa gobernador, gimanduan ang mga local nga kagamhanan sa pagpalapad pa ug pagmintinar sa ilang kaugalingon nga Temporary Monitoring ug Treatment Facility (TMTF).

Kini tungod kay, kadtong mld cases o dili kayo grabe nga kaso ug wala manginahanglan og pagpa-ospital, adtpo ra sila pagatambalan ug atimanon sa TMTF aron kapaluagan ang mga ospital ug ang mabakante nga mga katre didto, magamit ra sa mas grabe nga mga kaso sa Covid, segun sa paragraph X sa nahisgutang mandu.

Gani, subay pa sa EO 45, ang mga LGUs gimanduan sa paghimo og mga step-down facilities nga kapasudlan sa mga pasyente nga makagawas na sa ospital human makapasar sa luwas na nga sumbanan, ug adto na motiwas og pa-ayo sa iyang lungsod.

Kini gihapon subay sa tumong sa kagamhanan nga pabakantehan ang mga katre nga gipunsisokan sa mga pasyente.

Hinuon, gipadayag sa usa ka mayor sa lungsod sa Bohol ang ilang lisud nga kahimtang nga karon mapun-an pa sa dugang kalisud.

Si Mayor Willam Jao, sa lungsod sa Tubigon mibutyag nga bisan kon aduna sila’y tukma nga Quarantine Facility ug Community Hospital, lisud pa gihapon sa ilang kahimtang nga maoy uli-an sa mga gikan sa tambalanan ug didto na nagpaayo sa lungsod.

Ang Tubigon nakadawat og usa ka Quarantine Facility nga gipundohan sa Office of the Civil Defense Central Visayas samtang aduna unta silay Community Hospital nga may infirmary status apan puno usab ang ilang Covid Isolation bed.

Gipa-abut ni Mayor Jao nga walay igo nga doctor ug nurses nga makaatiman sa mga mopauli ug maconfine sa LGU Quarantine Facility, ug dugang pa, mas lisud sa mga BHW nga sila na usab ang ma expose sa mga pasyente.

Hinuon, sa katapusang taho sa Emrgency Operations Center sa Bohol Inter Agency task Force on the management of Emerging Infectious Diseases, ang Community Hospital sa Tubigon, aduna pay siyam ka katre apan dili sa ICU alang sa dili pasyente sa Covid.

Sa ubang kalungsuran, halos wala hinuoy mabati nga reklamo sa mandu sa pagpatukod og step-down facilities ug sa pagpalapad sa TMTF.

Sa kasamtangan, 40% sa mga aktibong kaso sa Covid sa Bohol, anaa sa Home Quarantine, laing 39 ka porsyento sa kaso anaa sa LGU TMTF ug 12 % lamang ang naa sa mga ospital.

Mikabat sa 2,179 ang aktobong kaso sa Bohol Septembre 22. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.