By Rey Anthony Chiu | 12:23 PM September 21, 2021

Sukad misulod ang Septembre, hangtud September 20, 121 na ang nadisgrasya sa coronavirus disease (Covid-19).

Subay sa kasauran nga gipaambit sa Bohol Inter Agency task Force on the management of Emerging Infectious Diseases (BIATF) miabut na sa 280 ang kaso sa mga pagkamatay dala sa Covid sukad sa Mayo 2020 hangtud Septembre 1.

Ug gikan sa Septmebre 1 hangtud sa Septembre 20, 2021, taho sa BIATF nga miabut na sa 401 na ka mga Bol-anon ang nahiagum sa makalilisang nga sakit nga ilang gikamatay.

Samtang anaa lamang sa kinatibuk-ang average nga 1.5 ang mamatay matag adlaw sa unang usa ka tuig ug duha ka buwan human midagsang ang sakit dinhi sa Bohol, daku nga diperensya ang gipakita niini sa katapusang 20 ka adlaw.

Segun pa gihapon sa taho sa BIATF, sukad sa Septembre 1 ngadto sa Septembre 20, lain nga 121 ka mga Bol-anon ang nadugang sa talaan sa mga nangamatay tungod sa Covid.

Sa inadlaw nga kwanta, sa 121 ka namatay sa 20 lamang ka adlaw, ang inadlaw nga ihap sa mga nangamatay miabut na sa 6.5.

Sa labing tataw nga pagkasulti, unom sa mga nasakit sa Covid ang namatay sa katapusang 20 ka adlaw.

Kini samtang nagkanihit na usab ang supply sa bakuna nga miabut sa Bohol.

Ang Bohol, matud pa sa mga taho, nagsalig lamang sa bakuna nga ikapadangat nganhi sa nasudnong kagamhanan.

Matud sa mga batid sa sakit ug epidemya, ang pagpabakuna aron kahatagan ang lawas sa tukma nga depensa batok sa sakit, mao lamay labing kasaligang pangontra sa makalilisang nga Covid.

Samtang nakalisud ang Bohol sa pagpangampanya sa libre unta aron mabakunahan ang kinabag-an, daghan pa gihapon nga nagdumuli sa pagpabakuna.

Apan sanglit mas maayo nga mas dali nga makab-ut sa Bohol ang gitumbok nga kadaghanon sa katawhan nga mabakunahan aron mabuntog na ang sakit, gikataho usab nga sa dili madugay, mahurot na ang bakuna nga napundo sa Bohol.

Niini, alang sa mas dali nga pagkab-ot sa herd immunity, mipahat ang syudad sa Tagbilaran sa P 9 milyones nga pundo pamalit og bakuna batok sa Covid.

Sa laing bahin, nagpahigayon ang Bohol Chamber of Commerce and Industry sa ilang kaugalingon nga pamakuna sa mga sakop nga wala sa priority list sa kagamhanan, sa mi-aging semana.

Ang duha ka mga pundok migasto sa ilang kaugalingon nga mga kwarta, ang usa gituyo gyud nga mipapahat niini samtang ang usa, mihimo sa pagpatapok sa mga pundo gikan usab sa ilang mga sakop.

Sa katungod sa syudad, tungod sa kini LGU, mahimo nga ang P9 M niini nga pundo, nakaabut sa 12,500 ka mga tupokan sa bakuna.

Sa sitwasyon sa BCCI, ang bakuna nga ilang gipalit, nagkantidad sa P900 ang matag tupokan, o tag P1800 ang duha ka tupokan. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.