By Rey Anthony Chiu, PIA-Bohol | 02:43 PM April 28, 2021
Sirado ang mga kadalanan pasulod sa Tagbilaran City sa Mayo 1, apan kini alang lamang sa mga walay importante nga tuyo.
Kini maoy gipasabut ni City Mayor John Geesnell Yap subay sa iyang Executive Order No. 12, series of 2021, samtang usab nangandoy ang Tagbilaran nga hugot nga ipatuman ang protocol o safety health measures kabahin sa social gathering niining panahon nga naghasi og maayo ang corona virus diseases (Covid-19).
Ang pwede makasulod niining adlawa, kadto ra nga mga frontliners, mga taga Tagbilaran, mga nagtrabaho sa Tagbilaran, mga tag-iyahan og negosyo ug mga tindahan sa Tagbilaran, kadtong mo labay sa Tagbilaran para mo trabaho, kadtong mga opisyal sa kagamhanan ug mga pasyente alang sa medical emergencies, segun pa sa pahibaw nga gipagawas sa syudad.
Kadong masarap sa mga checkpoints, kinahanglan lamang mopakita og valid nga identification aron kahukman kon makasulod ba o dili.
Matud ni Mayor Yap, ang lakang sa pagsira, subay usab sa InterAgency Task Force guidelines ug sa mga napagawas nga City Ordinances No. 297 ug 305.
Pinaagi sa nagpaluyo ng ordinansa, mahimong kapahamtangan og silot gikan sa P3,000 ngadto sa P5000, kadtong mga kabalayan nga maka lapas sa mando batok sa social gathering.
Dugang sa mayor nga ang tanang barangay pagamonitoron sa mga sakop sa Kapulisan, Barangay Tanod ug ALERT ilabina ang mga adlaw sa kapistahan sa kabaranggayan sa Tagbilaran April 30, May 1, 2, 3 ug 15.
Ang Abril 30 bisperas sa Tagbilaran, pista sa Mayo 1 dayon ang Mayo 2 bisperas sa Dao ug pista na usab sa Mayo 3. Sa Mayo 15, pista usab sa San Isidro.
Duha ka adlaw sa dili pa ang sugod sa pagdili sa social distancing, gitaho sa Bohol InterAgency Task Force ang 742 ka mga aktibong kaso sa Covid-19 sa Bohol.
Sa 742, 616 niini ang nagkaCOVID pinaagi sa pagkatakod samtang dinhi na sa Bohol.
Niini usab nga nahisgutan nga adlaw, natala ang 125 ka bag-ong kaso human kini maproseso gikan sa 670 ka mga nakuhaan sa swab samples, Abril 27.
Kini adunay positivity rate sa us aka adlaw nga 18 porsyento, o 18 sa matag 100 ka swab samples.
Kini nga ihap daku na kaayo og diperensya sa Abril 24 nga taho nga may 24 sa 330 ka swab samples nga giproseso o may positivity rate niadtong adlawa sa 7 sa matag 100 ka swab samples.
Niini usab nga adlaw, 213 ka mga taga Tagbilaranon ang kasamtangan nga nakigbugno sa Covid-19, 171 niini mga residente, 10 ang health care workers ug lain ga 32 ka mga piniriso nga gibantayan sa mga prisohan dinhi sa syudad.
Sa kadaghan, gipasabot sa Mayor nga modaku gyud usab ang posibilidad nga magkatakodtakod kon may mga motapnas nga dili magtuman sa lagda sa social distancing.
Usa ka health care worker usab mibutyag nga tungod sa dili parehas nga resistensya sa lawas, daghang mga tawo ang posibleng nia na niining sakit apan wala makapagawas ang ilang lawas sa mga timailhan o asymptomatic. Kini sila maoy mahimong delikado nga makapanakod tungod kay kompyansa ang tawo moduol sanglit walay timailhan sa kagaw nga makit-an. (rahchiu/PIA-7/Bohol)