By Rey Anthony Chiu, PIA-Bohol | 07:32 PM September 24, 2020
Dili pa gihapon makasulod ang mga Pinoy nga mo-adto sa Ukraine, Saudi Arabia, Brunei ug Malaysia, kini segun sa kasayuran gikan sa Department of Foreign Affairs (DFA).
Sa ilang Senamana nga Update sa Travel Restrictions nga gipatuman sa mga Pilipino, ang DFA mibutyag nga ang Ukraine mipahibaw pag-usab nga ang ilang pagdili sa pagdawat sa bisan asa gikan nga foreign nationals ug stateless persons, hangtud na sa Septembre 28, 202.
Hinuon, padayon pa gihapon nga makasulod ang mga Pinoy sa pipila ka nasud, basta lang kon kini sila may gihuptan nga UN o diplomatic passport, mga taga didto na, o may mga work permits ug may labing importante nga tuyo.
Apan bisan pa niini, kadtong mga mingbyahe nga gitugotan sa host nga nasud nga makasulod, kinahanglan pa gihapon sila nga moagi sa tukmang medical protocols sama sa kwarantina ug testing sa COVID inig abut.
Ang Brunei ug Saudi Arabia hinuon, wala pa magtugot sa pagpasulod sa kadaghanan gawas sa natumbok sa unahan, ug gani, nagsagop nag mas hugot nga medical protocols.
Sa laing bahin, ang entry ban nga una na nga gilatag sa Malaysia alang sa langyaw ug bisan pa sa naghupot sa propesyonal nga visit pass gikan sa 23 ka nasud apil ang Pilipinas, gipaluagan na karon, alang sa mga makapakita og pagtugot sa Malaysian Immigration Department ug may nakuha nga support letter gikan sa Malaysian Investment Development Authority (MIDA).
Segun sa DFA pinaagi sa ilang Foreign Posts, sa Americas, makasulod ang Pinoy sa Antigua and Barbuda, Bahamas, Brazil ug Dominican Republic, Ecuador, Haiti, Jamaica, Mexico ug sa United States of America basta may byahe lang ug ang mosulod, mopailawom sa tukmang medical protocols sa mosulod nga international nga pasahero.
Sa Asia-Pacific Region, makabyahe ang Pinoy ngadto sa Bangladesh, Cambodia, French Polynesia, Kiribati, Maldives, Micronesia, Mongolia, Nauro, New Zealand, Pakistan, Papua New Guinea, South Korea, Singapore, ug Timor Leste.
Sa Europa, makabyahe ang Pinoy sa Andorra, Azerbaijan, Belarus, Croatia, Montenegro, North Macedonia, Serbia, Turkey ug United Kingdom.
Sa Middle East ug sa Africa, makabyahe ang Pinoy sa Benin, Burkina Faso, Chad, Cote d’Ivorie, Djibouti, Egypt, Eswatini, Ethiopia, Guinea-Bissau, Iran, Kenya, Lesotho, Malawi, Mozambique, Niger, Nigeria, Rwanda, Senegal, Somalia, Sudan, Tanzania, United Arab Emirates ug Zambia.
Subay niini, tambag sa DFA ngadto sa publiko, batasana ang paglili sa DFA website aron matan-aw na daan kanus-a himoon ang pagbyahe, ug sa mga embahada nga padulngan, sanglit daghang nasud ang magpa-usab sa ilang mga pagdawat sa mga tawo, sa dili matagna nga oras. (rahchiu/PIA-7/Bohol)
