By Rey Anthony Chiu, PIA-Bohol | 07:27 PM September 24, 2020

Samtang nakabani-og na nga kadtong mga tawo nga may daan na nga gihambin nga sakit delikado gayud nga mas dali nga matakdan sa kagaw, may mga igo usab nga bansay aron sila mapanalipdan sa pagtakboy sa corona virus disease (Covid-19).

Kadtong may mga sakit sa kasing-kasing ilabi nag duna nay komplikasyon, diabetes, grabe nga sakit sa baga, luya nga immune system lakip na kadtong nagpatambal o nakalingkawas na sa kanser, sobra ka tambok, sakit sa bato ug sakit sa atay, mahimong makapanalipud sa kaugalingon ug sa iyang isigka tawo, segun sa sa Department of Health (DOH).

Kinahanglan lamang nila nga motubay sa mosunod nga mga sumbanan:

Kon may bisita sa balay, dili gayud mopaduol, ug dili gayud magpahikap ilabi na kon makighinangop.

Kinahanglan usab nga ang tawo nga may daan na nga gihambin nga sakit ang mismo nga mopahinumdom sa bisita ug sa mga sakop sa banay sa pagpanghunaw.

Batasanon usab ang pagtrapo sa mga pamatay kagaw niadtong mga gamit nga permi nga gunitan sa kadaghanan, ug likayan gayud permi ang makig-sagol sa mga tawo nga daan na usab nga may sakit o may ubos nga resistensya sa lawas.

Isip tawo nga may daan na nga balati-an, kinahanglan nga kanunay nga mangandam ug magpahimutang sa plano kon unsay buhaton kon pananglitan, may COVID-outbreak sa silinagnan, tambag sa DOH.

Kon pananglit, makabati nga may timailhan sa Covid-19 sa lawas, ayaw pagpanuko sa pagtawag sa Barangay Health Emergency Response Team (BHERT) o us aka doctor sa dili pa moadto sa us aka medical nga pasilidad sama sa tambalanan.

Kon dili kapugngan nga mogawas gayud sa balay, kinahanglan nga himoon ang estrikto nga pagbansay sa unsay may health ug safety protocol nga gipatuman sa balay, ug dalhon kini sa gawas.

Dugang pa niining tanan, pahinumdom sa DOH, magpabilin nga magtutok sa labing bag-o nga mga kasayuran gikan lamangs a mga kasaligan nga tinubdan, aron may makapangandam ug makapanalupod sa lawas. (rahchiu/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.