By Rey Anthony Chiu, PIA-Bohol | 12:36 PM July 17, 2020
Sukad sa Marso 16 ngadto sa Hunyo 25, moabut sa 123 ka tawo ang madakpan matag adlaw kay nakasupak sa hain man niadtong mga lagda nga gipatuman samtang ang kwarantina gipatuman sa Bohol.
Kini maoy mitumaw nga kasayuran sa gipadayag sa Kampo Dagohoy ang estasyonan sa kapolisan sa lalawigan sa Bohol, pinaagi sa taho ni Police Colonel Joselito Clarito, hepe sa Bohol Provincial police Office.
Didto sa gihimo nga virtual nga tigum sa Provincial Peace and Order Council ug Provincial Anti Drug Abuse Council sa mi-aging semana, gibutyag ni Col Clarito nga sa tulo ka buwan ug napulo ka adlaw, mikabat sa 12,357 ka tawo ang nasakpan sa kapolisan nga nakasupak sa mga lagda sa kwarantina.
Sa kadaghan, napakita sa Kampo Dagohoy ang ka delikado pa gihapon bisan pa kon pipila lamang ka kaso sa COVID-19 ang ania sa Bohol.
Kon ingan niana kadaghan ang madakpan, una man kaha kadaghana ang wala madakpi nga mas daghan ra ba gyud ang dili maatlan sa mga tinugyanan. Kini nagpakita sa dili maayo nga kinaiya, sulti pa sa mga sakop sa PPOC.
Dugang pa, daghang nadakpan ang dali rang nakalusot kat mobayad ra sa multa nga ginagmay segun sa sugo sa lungsod, dugang sa kapolisan.
Kahinumduman nga gipailawom ang nasud ug ang Bohol sa kwarantina sanglit ang mananakod nga corona virus makapanakod lamang kon may tawo nga kasakyan niini ngadto sa ubang tawo.
Dinhi sa Bohol, nagpusotpusot nga mga Executive Orders ang gipagawas sa gobernador aron ipatuman ang mandu sa katawhan nga magpabilin sa sulod sa balay.
Gipatuman sa Bohol pinaagi sa ang Executive Order 28 nga naghabol sa tibuok Bohol sa curfew sugod alas 9:00 sa gabii nagdto na sa alas 5:00 sa buntag, travel ban sa tanang mosulod sa Bohol, ang pagsuspenso sa klase, pagdili sa inum sa pangpublikong lugar, social distancing, pagtapok-tapok, pugos nga paggamit sa face masks, paggamit sa home quarantine pass.
Pipila ka adlaw human niadto, gipagawas na usab ang laing Executive Order aron dumalahon ang pagpabukas sa pili nga mga establisemento basta makasubay lamang sa mga sumbanan ug lagda alang sa kaluwasan sa tanan nga dili matakdan.
Labing daghan sa mga pagsupak nga natala mao ang pagsupak sa social distancing nga may 6,660 ka tawo ang nadakpan.
Sa pagpatuman sa facemask, adunay 2,602 ang nadakpan nga minggawas sa ilang panimalay nga walay sul-ob nga facemask.
Miabut usab sa 815 ang nadakpan nga nakasupak sa alas 9 nagdto sa alas 5 nga curfew, 711 ka buok menor de eada ang nakasupak sa EO No. 16 o ang paggawas sa menor de edad nga wala sa ilang adlaw nga tinggawas.
Sa Exec Order 17, 550 ka tawo ang nasakpan nga nag-inum sa publikong lugar o nahubog nga mingsupak sa mandu.
Sa mga edaran ga nakasupak sa EO 17, 217 ka mga senior citizens nga sobra sa 65 anyo ang nadakpan nga minggawas nga wala sa ilang adlaw nga gitagana nga tinggawas.
