By Rey Anthony Chiu, PIA-Bohol | 07: 36 PM April 09, 2020
Usa ka Bol-anon nga frontliner, dili hinuon sa pagpakigbugno sa Coronavirus apan sa pagpalig-on sa banay aron mas makatabang sa pagpalig-on sa komunidad ang gidayeg sa Commission on Population and Development 7 (POPCOM-7) sa iyang pagrisgo sa kaugalingon lamang mapatunhay ang gimbuhaton alang sa pagdumala sa populasyon.
Gitumbok ni Atty Bruce Ragas, Regional Director sa POPCOM-7 Central Visayas si Ms. Cecille Mancha Bayocboc, usa ka public health nurse ug ang local nga Local Population Officer –Designate sa San Isidro, Bohol sa iyang bayanihon nga buhat pagpaasdang sa serbisyo sa pagplano sa pamilya niining panahon nga ang tanan nagkwarantina.
Samtang ang POPCOM-7 naghimo og pilot sa ilang mga programa sa mga lugar sa rehiyon sama sa San Remigio, Alcoy ug Boljoon sa Cebu; ug Tanjay sa Negros Oriental, ang programa ni Bayocboc sa San Isidro, Bohol nakita sa rehiyonal nga mga tinugyanan nga sulondon gayud.
Kon sa mga nahisgutan nga mga pilot areas sa Region 7 Central Visayas, ang mga natudlo ug nasangonan nga mga Population Officers naghimo og personal nga paglibut sa mga kabalayan aron isuroy ang mga serbisyo sa POPCOM ug itanyag ang mga modern nga sistema sa pagplano sa banay ug nga kagamitan niini, wala kini baliha ni Bayocboc, kinsa nasayud sa sangputanan sa COVID kon dili siya mag-amping.
Bisan sa pagtuo nga delikado ang magsige og gawas, si Bayocboc ug ang mga tinugyanan sa Rural Health Unit sa San Isidro Bohol, nagpaambit sa serbisyo sa family planning ilabi na gayud sa contraceptive injectables, condoms ug pills aron, bisan kon ang managti-ayon gidid-an sa paglakawlakaw, may igo sila nga magamit alang sa mas responsable nga pagpuyo.
Matud sa POPCOM, bisan nga ang Covid-19 health crisis nagpahunong sa daghang mga serbisyo alang sa komunidad, daghan nga sama kang Bayocboc nga Population Officers ang aktibo sa frontline nga nagpabiling desidido sa pagseguro nga dili mapaundang ang tinubdan sa serbisyo sa family planning, taliwala sa Enhanced Community Quarantine (ECQ) nga gipatuman sa mga lalawigan sa Central Visayas.
Kini bisan pa ang ang nga serbisyo sa family planning gisukip na sa pagbisita sa mga ginikanan sa mga health centers atul sa pagpamakuna sa kabataan samtang ang mga buros ug mabdos, kanunay pa gihapon ng gihatagan sa kasayuran kabahin sa family planning sa panahon nga motanda sila sa RHU sa ilang pre-natal visits.
Kini aron mas magamhan ang kababayen-an sa saktong tumong sa paghatag og igong panahon nga makapahiuli sa lawas ang inahan human sila manganak.
Sa kaso sa San Isidro Bohol, matud sa POPCOM, ang ilang mga midwives ug nurses gikan sa Rural Health Unit sa lungsod, nakighiusa usab sa pagbisita sa mga kabalayan nga kasamtangan nga nagsagop sa family planning, aron magdala paduol sa mga serbisyo ngadto sa katawhan bisan sa ECQ.
