BOHOL WEATHER

Bohol Island News

Your source of reliable news and content in the island.

Jagna’s ‘Pansit Yaning’ adunay BFAD permit na

By: Rey Anthony Chiu/PIA-Bohol| 09:43  PM September 5, 2019

Pansit Yaning 1
Mahimo na nga modisplay sa mga tindahan nga walay kahadlok nga makadaut ang ilang mga pansit nga gibaligya.

Kini maoy gibutyag ni Dominiciana Jamora, Presidente sa Lubcanan Association for Cultural and Environmental Heritage (LACEH), usa ka kahugpungan sa local nga mga kababayen-an nga nangindahay nga mo-uswag ang kinabuhi pinaagi sa paghimo og pansit nga daghag nutrina.

Nagsunod sa negosyo sa paghimo og uga nga pansit (noodles) gikan sa natural nga mga sahug, ang mga kababayen-an sa LACEH nga nanginabuhi sa pamansit aron ikapaka-on sa ilang mga banay, mihimo na sa mga pansit nga gikan sa mas may nutrisyon nga mga sahug.

Natural na alang kanila ang pansit nga hinimo sa kalabasa, matud ni Jamora, kansang kahugpungan misagop na sa brand name nga Pancit Yaning.

Nagsugod isip pancit nga ginama sa itlog (eggnoodles), ang Pancit Yaning gisunod sa mga taga LACEH gikan sa una nga banay nga naghimo niini.

Pansit Yaning 2
Ang lamian nga Pansit Yaning sa lungsod sa Jagna. Photo: LACEH

Pila ka tuig ang milabay human ang banay ni Yaning mihatag og trabaho sa ilang mga silingan aron makatabang paghimo og pancit, nadiskubre nila ang mga mas nutrisyoso nga pansit nga ang sahog: kamunggay, kabasa ug udlot sa kamote.

 

Nahatagan usab sa usa ka Common Service Facility sa kagamhanan ug mga teknikal nga tabang gikan sa Department of Trade and Industry, Agriculture ug Science and Technology, mas naaghat pa ang mag sakop niini sa pagpamaayo sa ilang produkto.

“Among gisuwayan og hatag og solusyon ang suliran sa pagpakaon sa kabataan sa mas nutrisyoso nga pagkaon, sa paghatag og dugang kinitaan sa mga ginikanan ug sa pagpatunhay sa pagpa-eskwela sa mga sakop,” saysay ni Jamora.

“Ang mga kabataan karon, mas mopili na sa pansit kay sa pagkaon og utanan, mao nga nangutana kita, unsa kaha kon ang utanon, maoy himoon nga pansit?” dugang ni Jamora.

Usa ka kahugpungan nga may daghang sakop nga nagtungha pa, ang LACEH nagpadayon pa gihapon sa ilang paghimo og pancit bisan pa kon nagsige pa sila og proseso sa ilang permit gikan sa Bureau of Food and Drugs (BFAD) aron ikapaneguro nga luwas ang ilang gibaligya.

Alang sa ilang 67 ka banay nga sakop, gipadayon pa gihapon nila ang paghimo sa pansit, bisan pa usab nga dili una sila mosupply sa mga orders nga ang uban, gikan pa sa Mindanao.

Kaya sa LACEH nga mohimo sa 144 ka putos sa matag adlaw, aron lamang mabuhi ang ilang mga sakop.

Apan, karon, malipayon nga gitaho ni Jamora, nadawat na nila ang ilang BFAD permit.

Kini nga katikaran, gikalipay sa mga taga Jagna, sanglit mahimo na sila nga mopalapad sa ilang produksyon sa pansit kay ang BFAD magtugot na kanila nga magbaligya gawas sa Bohol ug sa mga dagkong malls sa kaulohan.

Gawas pa, mas nahinam si Jamora, kay kini usab basin mao nay sinugdanan sa mas maayong kinabuhi sa ilang mga sakop.

Leave a Reply

This site uses Akismet to reduce spam. Learn how your comment data is processed.

%d bloggers like this: