By PR | 02:10 | July 19, 2026
TAGBILARAN CITY, Bohol—Giaghat ni Gobernador Erico Aristotle Aumentado ang tanang sakop sa mga konseho sa nutrisyon sa tibuok Bohol, apil ang mga Barangay Nutrition Scholars ug mga Bol-anong mingtuo sa dakong tabang sa maayong nutrisyon ngadto sa kalambuan, sa pagpakighiusa alang pagpananum og mga kahoy nga mamunga (Fruit-bearing trees) karong Hulyo 21, 2026 pohon.
Ang panawagan sa gobernador natala sa Memorandum Advisory 2026-0012 nga nag-mandu sa tanang sakop sa Provincial Nutrition Council (PNC), Municipal Nutrition Councils sa kalungsuran ug Barangay Nutrition Councils, nga pangunahang ang pagpananum og mga kahoy nga mamunga, isip isa sa mga kalihukan pagsuporta sa Nutrition Month.
Sa buwan sa Hulyo, gisaulog sa nasud ang Nutrition Month, ug subay sa tema nga Sa Philippine Plan of Action for Nutrition (PPAN) sama-sama sa Nutrisyong Sapat, Para sa Lahat, ug sa Nutrisyon at Kalikasan, ating Pangalagaan, ang pagpananum mga kahoy nga mamunga makahatag og duha ka punto alang sa mga programa sa nutrisyon: ang pagsegurado sa pagkaon, ug ang pagkasegurado sa kalikopan nga makatabang sa tanan.
Timailhan lamang kini sa importante nga pagkasumpay sa nutrisyon ug kalikopan, samtang nagtudlo nga ang pagpanalipod sa kalikopan mahinungdanon kayo sa pagpatunhay sa malungtaron nga suplay sa pagkaon, segurided ug maayong nutrisyon alang sa mga somusunod nga henerasyon, dayag ni Aumentado.
Alang sa mga munisipyo nga mosalmot, nanginahanglan usab ang PNC sa pnga litrato o hulagway sa kalihukan sa fruit tree planting.
Human sa yano nga mga kalihukan sa pagbukas sa Nutrition Month, segun sa giprograma sa Konseho sa lalawigan ubus ni Gob Erico Aristotle Aumentado, magpang-apud-apod usab ang PNP og mga food packs alang sa mga ginikanan nga may 6-23 ka buwan nga bata nga natimbang ug nasayrang wala sa saktong gibug-aton ug kadtong mga putot.
Sa Hulyo 16 adto ang pagpanghatag og food packs sa Batuan, Bien Unido, Carmen ug San Miguel, samtang sa Julyo 20, adto na usab sa Clarin, Getafe, Sagbayan, inabanga, Loon ug Tubigon.
Sa Hulyo 23 adto ang distribution sa food packs sa Jagna, Guindulman, Duero, Loay, Lila, Alicia Baclayon, Anda ug Valencia.
Sa Hulyo 27 usab, adto sang pagpanghatag og food packs sa mga bata nga sawot ug putot sa Ubay, Pitogo ug sa Talibon.
May ipahigayon usab ang PNC nga Nutri-Diet Counseling, didto sa mga kalungsuran nga nakit-an nga may labing daghang mga sobra na ka tambok, sa Hulyo 24.
Sa pagtak-op sa Nutrition Month, ang kalihukan sa Bohol Cultural Center sa Hulyo 31 padaganon sa mga kalingawan sama sa Nutri-Dance Contest, Nutri-Quiz Contest, Nutri-Balak Contest, Nutri-Singing contest, Nutri-Cooking Contest ug Poster-making Contests. (PIABohol)
