By PIA-Bohol| 10:07 AM June 16, 2026
TAGBILARAN CITY, Bohol— Samtang mingtikang na sa double digits ang inflation rate sa silingang lalawigan sa Sugbo, nagpabilinnga labing hinay ug mas kontrolado ang gipakita nga paglihok sa presyo sa mga nag-una nga paliton sa Bohol, nga may 7.4 porsyento sa buwan sa Mayo, ug labing ubos pa gihapon sa tibuok Central Visayas.
Segun sa kasayuran nga gipagawas sa Philippine Statistics Authority (PSA) didto sa ilang binuwan nga pagpagawas sa ilang monitoring sa dagan sa presyo sa mga paliton dinhi sa rehiyon, gibutyag ni PSA Bohol Chief Supervising Statistician Jessamyne Anne Alcazaren nga samtang ang inflation rate sa Central Visayas nalansang sa 10.8 percent sa Mayo sama sa Abril, ang sa Bohol pa gihapon ang labing ubos sa 7.4 percent sa kinatibuk-ang rehiyon.
Ang inflation sa Cebu City sa buwan sa Mayo, mingtala sa 9.1 percent, o 0.6 puntos ang kauboson sa inflation nga natala sa mga highly urbanized nga syudad sa Lapulapu ug Mandaue nga anaa na sa 9.7 porsyento.
Sa 13.6 porsyento, labing taas ang inflation rate nga natala sa lalawigan sa Cebu, apan nagpabilin nga labing ubos ang sa Bohol sa 7.4 porsyento.
Samtang may namatikdang 0.2 porsyento nga pagsaka sa inflation sa Bohol gikan sa Abril, matud sa PSA, ang paglihok sa presyo dinhi sa Bohol na-angin sa mas paspas nga pagsaka sa presyo sa pagkaon ug mga ilimnon nga dili makahubog nga gikan sa 7.0 ngadto na sa 8.0 sa Mayo.
Kini gisundan pa usab sa presyo sa restaurants ug mga balay kapahuwayan nga gikan sa 3.4 porysento, mingtikang na ngadto sa 5.2 porsyento.
Labing dagko nga kina-ingnan nga nakatampo sa inflation mao ang pagkaon nga may 41.2 percent nga tampos sa inflation; sa panakyanan nga may 35.1 percent ug sa pabalay, tubig, koryente, gas ug uban pang igsugsugnod nga ming silaub ngadto sa 8.8 % hikan sa 0.65, segun sa PSA.
Tungod usab niini, gitaho usab sa PSA ang paglihok sa presyo sa pagkaon, nga sagad maoy permi gigahinan sa mga mamumuo nga gagmay ra og kita.
Gikan sa 7.4 porsyento sa Abril, ang inflation sa pagkaon sa Mayo, anaa na sa 8.4 porsyento. (PIABohol)
