By PIA-Bohol | 06:37 PM April 21, 2026
TAGBILARAN CITY —Gilugwayan sa Land Transportation Office (LTO) ang validity sa driver’s license ug ubang mga dokumento nga mo-expire sa Abril o sa ulahi sulod sa tulo ka buwan.
Sa usa ka pahayag, gipahibalo ni LTO Chief Assistant Secretary Markus Lacanilao nga ang extension subay sa direktiba gikan ni Presidente Ferdinand R. Marcos Jr. ug sa pagdeklara sa state of national energy emergency sa nasud.
Matud pa ni Lacanilao nga kini nga lakang nagtumong sa pagpagaan sa palas-anon sa publiko taliwala sa pagsaka sa gasto sa gasolina ug mga batakang palaliton, paghatag og igong panahon sa mga motorista sa pagtuman nga walay dugang pinansyal nga kapit-os.
Sa partikular, ang extension naglangkob sa driver’s ug conductor’s license, student-driver’s permit, ug motor vehicle registrations.
“During the extended period, no surcharges, penalties, or fines will be imposed for late renewal (Sa gidugayon nga panahon, walay mga surcharge, silot, o multa ang ipahamtang alang sa ulahi nga pagbag-o),” matud pa ni Lacanilao.
Sa usa ka memorandum circular nga gi-isyu ngadto sa tanang LTO regional directors ug local executives, ang LTO nagkanayon nga ang maong lakang gi-isyu isip konsiderasyon sa pagkunhod sa mga adlaw sa trabaho sa mga buhatan sa gobyerno ug sa gipaabot nga pagdagsang sa mga transaksyon.
Ang lakang magpadayon nga epektibo hangtod sa dugang nga pahibalo gikan sa LTO. (ECB/PIA7-Bohol)
